La Xunta de Personal Docente alerta de la perdida de puestos

La comisión permanente de la Xunta de Personal Docente diz que los retayos nel sistema educativu van traer perdida de puestos de trabayu y amenorgamientu de la calidá educativa.

La XPD recuerda al Conseyeru'l so compromisu d'informar sobre'l nuevu decretu d'orientación y afirmen que vienen esixendo la negociación d'un nuevu modelu y el caltenimientu de tolos puestos esistentes nes plantiyes.
 
Sicasí, señalen que les declaraciones del Conseyeru paecen tresmitir a la opinión pública la inminencia de l'aprobación d'un decretu que nun pasó nengunu de los trámites llegales previos.

Per otra parte, ante'l calendariu d'axudicaciones de places, la Xunta de Personal solicitó una xunta urxente p'analizar  la situación  “que pon en peligru numberosos puestos de trabayu pal próximu cursu”.

“Les direiciones de los centros foron informaes de los retayos que van sufrir pal próximu cursu: como media podemos falar d'ente tres y cinco profesor menos por centru educativu”, afirmen.

Pa finar, recuerden que les instrucciones d'empiezu de cursu nun se conocen y nelles ye onde van figurar los amenorgamientos que se tán aplicando yá “y que tán xenerando enorme malestar nos claustros”.