El Gobiernu asturianu quier eliminar les subvenciones a los colexos que “segreguen” a los sos alumnos

El Conseyu Escolar d’Asturies dio’l preste a la propuesta del Gobiernu asturianu sobre les bases qu’han rexir los conciertos educativos durante los prósimos 4 años, nes que s’inclúi eliminar les subvenciones a los colexos que segreguen al so alumnáu  por xéneru.

Esta medida supón que’l Principáu va dexar de subvencionar a toos aquellos colexos non mixtos. Na so aplicación práctica la norma va afectar a dos centros educativos nel nuesu país, los colexos Los Robles, de neños, y Peñamayor, de neñes, dambos venceyaos al Opus Dei.

La propuesta del Principáu, defendida ayer pol conseyeru d’educación José Luís Iglesias Riopedre, conseña nel so artículu 15 que’l “titular del centru ta obligáu a respetar la igualdá de toos ensin que pueda prevalecer discriminación alguna por razón de nacimientu, raza, sexu, relixón, opinión o cualesquier otra condición o circunstancia personal o social”. Los colexos afectaos yá dieron anuncia de la posibilidá de recurrir la norma per vía xudicial.