UNA pide al Principáu que defenda a los ganaderos énte l’Estáu

El voceru d’UNA, Faustino Zapico, pidió al Principáu que puxe cola máxima firmeza pa que los ganaderos afeutaos poles llenes reciban les ayudes que yá se recibieren n'otres partes.

UNA quixo tresmitir asina la so esmolición y refugu énte la “discriminación” sufrida pol campu asturiano na concesión de les ayudes per parte del Gobiernu central pa compensar les perdes que sufriere esti sector poles llenes.

Pal voceru d'UNA, Faustino Zapico “si la posibilidá de conceder les ayudes al campu asturiano, pasa per reformar el Real Decretu de 18 de marzu de 2005 va haber que facelo darréu".

Amás, señaló que si cuando hubo necesidá, el Gobiernu Central dictó una Orde Ministerial pa facer posible la concesión d'ayudes a esti sector nes mesmes circunstancies n’Andalucia, “hai qu'adoptar les mesmes midíes pa que la nuestra Comunidá Autónoma reciba esactamente'l mesmu tratamientu”.

A xuiciu de Faustino Zapico, “de nun ser asina y caltenese esta inaceptable diferencia de tratu, pondríase una vegada más de manifiestu la diferencia abismal existente ente unes y otres Comunidaes, demostrando que los tan invocaos principios d'igualdá y de solidariedá interterritorial son declaraciones de principios que nun tienen la más mínima virtualidá práutica”.

Pa cabu, el voceru d'UNA encamienta al Gobiernu Asturianu a defender los intereses de los ciudadanos d'Asturies pa que estes ayudes puedan ser una realidá.