Riopedre defende’l “billingüísmu” de la educación asturiana

El Conseyeru d'Educación fixo balance de dellos programes educativos de fomentu del billingüísmu, onde fixo una pequeña referencia a la matriculación d’asturianu “que sigue al alza”.

José Luis Iglesias Riopedre fixo’l pasáu sábadu balance del cursu 2009-2010 en diversos programes educativu y avanzó les característiques que va tener el Decretu d'Orientación que na actualidá ta en tramitación.

En cuanto al balance de dellos programes educativos del cursu 2009-10, el Conseyeru d'Educación y Ciencia destacó los d’idiomes, onde 14.043 estudiantes participaron en programes billingües y cursos gratuitos pa mozos. Concretamente, desenvolviéronse Programes Billingües en 173 centros educativos (97 de Primaria, 54 de Secundaria y 22 centros concertaos).  Beneficiáronse 12.900 alumnos (9.700 d'Educación Primaria y 3.200 de Secundaria) y participaron nel proyectu 515 profesionales (434 docentes y 81 auxiliares de conversación).

Los auxiliares de conversación son nativos que refuercen la práctica oral d'idiomes nes aules. Impartiéronse amás Cursos gratuitos pa mozos na Escueles Oficiales d'Idiomes a 1.143 alumnos, son pa edaes entendíes de 18 a 30 años y diséñense a la carta, a la midida de les necesidaes de los estudiantes y traten de favorecer la conversación y afondar  nel llinguaxe técnicu.

Les iniciatives nesta materia tamién s'estienden al branu, un total de 453 estudiantes van participar en programes d'inmersión d'idiomes, 303 n'Asturies y 150 nel estranxeru. Hai cuatro actividaes; Campus de Branu d'inglés. Inmersión Llingüística de branu nel Estranxeru  ya Idiomes Branu Mozu.

Depués d’esplicar tolos programes de fomentu del billingüísmu, el Conseyeru tamién fixo balance de la matriculación en llingua asturiana, “que sigue al alza”, rexistrándose un aumentu del 91% nos centros públicos de Primaria y del 88% nos centros de Secundaria nel últimu deceniu. Sicasí, Riopedre nun fixo referencia a nengún programa que puxe pol espardimientu del idioma ente los escolinos d’Asturies.