Buendía destaca'l consensu pa caltener la unidá ambiental

El conseyeru d'Infraestructures y Mediu Ambiente destacó'l consensu ente Principáu, Junta, executivu cántabru y l'Estáu, pa "caltener la unidá ambiental" del parque de Picos d'Europa.

Asina lo señaló Francisco González Buendía acabante salir de la xunta de los representantes de les tres autonomíes y el secretariu d'Estáu d'Agües y Mediu Rural del Ministeriu de Mediu Ambiente, Josep Puxeu. L'alcuentru convocóse pa dar treslláu al Gobiernu central del acuerdu algamáu ente Asturies, Castiella y Lleón va un mes en Cuadonga, sobre la futura xestión conxunta del parque nacional.
  
Buendía confirmó que'l Ministeriu "ta acordies dafechu cola propuesta de decretu pa cumplir la llei de bases de parques del 2007, pa que nun haya disgregación de nengún tipu, y que se caltenga la unidá ambiental". "Les soluciones", siguió, "satisficieron al Ministeriu".
  
El conseyeru reseñó que'l área protexida va xestionase per "l'articulación d'un consorciu, onde se van introducir tolos medios materiales y humanos que recibiéramos nes tresferencies". "Habría una comisión de xestión na que participaría con voz sin votu l'Alministración central y ún de los conceyos de la zona de Picos por turnos", añadió.
  
No referente a les cifres económiques de les tresferencies, el representante asturianu remitióse al capítulu 6, el d'inversiones, que "nel añu 2009, un bon añu, foi de 3.260.000 euros".  Sicasí, quiso destacar que "lo más importante ye lo simbólico de que trés comunidaes de distintu signu políticu mos pongamos d'acordies cola Alministración central col envís de caltener esta unidá ambiental del parque de Picos d'Europa".
  
Preguntáu por si los distintos colores de los gobiernos de cada comunidá puen ser focos de conflictu na futura xestión, Buendía mostróse optimista. "Yo nun vi nenguna cuestión d'índole políticu, nun siendo los lóxicos discutinios sobre la xestión, pero lo que toles comunidaes queríen yera que'l parque siga funcionando a lo menos como agora o meyor qu'agora".
  
El plazu estimáu pa l'acabación del procesu de tresferencies sigue siendo a últimos d'ochobre del presente añu, y asina empezar a funcionar oficialmente como consorciu a partir del 1 de xineru del 2011. Señaló como principal dificultá la peculiar tresferencia de competencies qu'ha articulase d'equí p'arriba, pues afecta a caúna de les trés autonomíes implicaes. Asina, va realizase pente medies d'una "estrecha coordinación" ente los trés gobiernos autonómicos y los ministerios d'Economía, Politica Territorial y Mediu Ambiente, ente otros.