Asturies tien la tercer tasa d'emancipación xuvenil más baxa

Los asturianos son los menos emancipaos d'España depués de cántabros, ceutís y melillenses. La tasa d'emancipación ye del 37,6%, nueve puntos perbaxo de la estatal.

Asina lo reflexa l'informe sobre la 'Situación llaboral de la mocedá asturiana nel 2009', presentáu güei por CC.OO. El secretariu xeneral del sindicatu n'Asturies, Antonio Pino, y el secretariu de Mocedá de la organización, Andrián Redondo, ofrecieron una rueda prensa pa culpar d'esta situación a les condiciones de trabayu xuveniles, al paru nesti sector poblacional y al preciu de la vivienda.

  
Según reflexa l'informe, la tasa d'emancipación de la mocedá asturiana ta en 37,65, mientres que la media nacional ta nel 46,8%. Asina, n'Asturies los mozos d'ente 18 y 24 años tienen que dedicar más d'un 64% del so sueldu a la vivienda, y los d'ente 25 y 29 sobre un 52%.
  
Son algunos de los datos mostraos polos representantes sindicales pa facer gráfica una situación que Pino consideró "bien grave". Señaló nesti sen cuatro aspectos significativos. El paru xuvenil pasó del 16,3% nel 2008 al 27,10% nel 2009, "pese a que tamos perbaxo de la media nacional dos puntos". La tasa d'ocupación baxa ente'l 2008 y el 2009 nun 11,6%, polo que "reduzse tamién en conclusión de manera significativa'l númberu de trabayadores homes y muyeres mozos ocupaos n'Asturies".
  
La tasa de temporalidá aumentó nel 2009 sobre'l 2008 un 3,7%, pasando del 42,82 al 44,43%. "Tamos dos puntos penriba de la media nacional", señaló.
  
A lo último, comentó que "los xornales son un 64% menores n'Asturies que los xornales de los adultos". No referente a los sueldos, dase una situación paradóxica, en relación cola media española. Los menores de 25 asturianos tienen un sueldu mayor que'l mediu estatal (13.096 euros sobre 12.442), y la franxa d'ente 25 y 34 años d'Asturies cobra menos que la media (17.199 frente a 17.879 nel conxuntu d'España). Los menores de 25 años asturianos son los quintos que más cobren per detrás de navarros (14.660), vascos, aragoneses y baleares.
  
Pa Pino, estos datos "son bien elocuentes y ponen de manifiestu la gravedá de la situación de los mozos en términos llaborales y sociales".
  
Considera que la situación va agravase colo incluyío na reforma llaboral en materia de contratu xuvenil.
  
"Lo qu'hai ye un contratu en práctiques qu'amplía'l periodu pa tener los estudios acabaos nun plazu de cinco años, en llugar de cuatro", criticó'l sindicalista. Recordó tamién que s'amplía l'ámbitu de les titulaciones, puesto qu'hasta agora teníen de ser títulos oficiales y agora van valir los certificaos de profesionalidá. Van Tener un xornal del 60% de lo fixao nel conveniu de la categoría correspondiente'l primer añu y un 75% el segundu añu y nun tienen desempléu. Amás, comentó que'l contratu de formación amplíase hasta los 25 en llugar d'hasta los 21.
  
Al so xuiciu, esta situación "favorez el que los empresarios puean abusar na contratación, con llenda de prestaciones sociales". "Ponse acentu pa que puean trabayar más mozos, pero va precarizase'l mercáu llaboral español y el mercáu llaboral asturianu", criticó. Dende'l puntu de vista de Redondo, "lo que fai ye estender la precarización a otros sectores de la sociedá n'edá y xéneru".
  
Pino recordó que los mozos "tuvieron una participación bien significativa na creación nel empléu n'Asturies, ente 1999 y 2008, cola ocupación del 14% del empléu pero, eso sí, en condiciones llaborales males".
  
Ambos alertaron que "los mozos son más que probablemente'l colectivu llaboralmente más vulnerable y el más afectáu pola crisis", y llamaron a la participación na manifestación sindical convocada pal próximu 30 de xunu y na güelga xeneral del 29 de setiembre.