La Universidá nun ta en condiciones pa l'adaptación a Europa

Vicente Gotor alvirtió que la institución "nun ta en condiciones óptimes" pa l'adaptación al Espaciu Européu d'Educación Superior (EEES), tamién conocíu como'l Procesu de Boloña.

En declaraciones a los medios, Gotor destacó que "va haber que tomar decisiones pa optimizar recursos, y algunes van "ser dures" en relación al contestu económicu, les dificultaes de financiación de la Universidá y los recortes previstos.
  
Asina, recordó que mañana va comparecer na Xunta sobre'l Proyectu de Llei del Principáu d'Asturies de midíes urxentes de contención del gastu y en materia fiscal pa la reducción del déficit públicu.
  
"Como que ta la situación hai que ser astutos pa reducir gastos y llevar partíes a investigación y docencia", dixo'l rector, qu'entiende que "nun val de nada quexase" y por contra "hai que dir palantre". Sicasí, comentó que n'Alemaña los axustes nun se ficieron nin en formación nin n'investigación.
  
"El decretu yo asúmulo a nivel personal, pero la mio situación igual ye distinta a otros con sueldos inferiores na Universidá y otros organismos", apuntó'l rector al tiempu que comentó que "habría que pensar si n'otres organizaciones podría reducise o non".
  
Gotor defendió que la Universidá "fixo munches coses con poco dineru" y calcó na contención del gastu, y punxo como exemplu que'l presupuestu del rector ye "la metá qu'antes".  
 
Retrasu nes notes online
  
Per otra parte, el rector esplicó que l'aplicación informática na que tienen qu'introducir les notes de la nueva selectividá "va más lenta de lo previsto" y poro nun puen dase a conocer los resultaos de les pruebes de momentu. Sicasí, confirmó que sí van tar disponibles pa mañana, calteniéndose asina la fecha oficial prevista.
  
Nos últimos años, los alumnos pudieron conocer les notes de los exames de la PAU, al traviés d'Internet y con una clave personal, la tarde antes de la xornada oficial d'entrega de notes nos centros educativos, recordó Gotor.
  
Sicasí, nesta ocasión l'equipu rectoral desconoz si l'aplicación va permitir dar a conocer les notes a lo llargo de la tarde-nueche de güei de forma 'on line', o los estudiantes van tener qu'esperar a mañana.