Preséntase en Xixón la obra ganadora del ‘Fierro Botas’

Javier Cubero presenta güei en Xixón la obra ganadora del II Premiu d'Ensayu Fierro Botas 'Del romanticismu al rexonalismu: escritores carlistes na lliteratura asturiana'.

La obra parte dende un enfoque teóricu que cuestiona la concepción dominante de la historia. L’autor indica que cuando s’estudia’l conxuntu d’una sociedá o d’un fenómenu social determináu nun mesmu momentu temporal, la investigación hestórica favorez a aquellos axentes sociales que participen activamente de les instituciones estatales mientres que subestima a los sectores que nun participen d’eses instituciones, “clases populares en xeneral”, y desprecia especialmente toa tendencia cultural, social o política que cuestione la estabilidá y/o la funcionalidá del marcu estatal constituyíu nel presente como marcu históricu unitariu.

Pa l’escritor, esto determino tanto la marxinación de la llingua asturiana y de la so lliteratura na imaxe que la sociedá asturiana tenia y tien de sí mesma, “ya igualmente tien muncho que ver cola non menor marxinación del carlismu, los sos fechos, personaxes ya idees na historia académica ya institucional”.
 
“Los carlistes foron derrotaos, y non solo les sos guerrilles desapaecieron de la xeografía asturiana, ellos mesmos pasaron a ser marxinaos na historia oficial de les estructures del poder”, indica Cubero.

L’historiador diz que dalgo asina ocurre cola llingua asturiana, “que molestaba a un determináu discursu covandongista, faciéndose muchu tiempu darréu una historia d’Asturies onde’l tratamientu de la realidá billingüe del país yera talu que paecía qu’Asturies fuera un país monollingüe en castellán”.

“Asturies, proclamada cuna de una recién inventada nación unitaria, sedría’l recipiente de les esencies de lo español, asina como un continuu exemplu de llealtá al Estáu. Los carlistes autóctonos sobraben, la llingua astur tamién”, señala.

Cubero apunta que nuna dómina na que n’Asturies lo normal yera escribir en castellán, l’asturianu yera una especie de patois, asociáu a la incultura y al atrasu, “y non apaeciendo normalmente na lliteratura más que de forma esporádica pa tratar temes folcloristes y costumbristes, siempres dende una perspeutiva dialeutante, ye onde hai que situar los esfuerzos escontra vientu y marea de los escritores carlistes en pro de la dignidad de la llingua asturiana”.

Asina, fala d’Acebal, Fernández de Castro, García Rendueles y el Padre Galo, “que coles sos obres amosaron que l’asturianu nun yera nin mas nin menos válidu que’l castellán pa escribir sobre temes d’alta cultura”.

'Del romanticismu al rexonalismu: escritores carlistes na lliteratura asturiana', que tien un prólogu de Lluís Xabel Álvarez tituláu ‘De carlistes, lliteratura y asturianismu’, presentase a les 19.00 hores, na sala de recepciones del Conceyu de Xixón.