Los inmigrantes van concentrase contra les últimes agresiones

L'Asociación d'Inmigrantes Residentes n'Asturies (AIRA) entama una concentración n'Uviéu pa protestar poles últimes agresiones de carácter racista.

Les agresiones foron contra una inmigrante ecuatoriana en Barcelona y contra una inmigrante china en La Felguera. L'actu va tener llugar na Avenida de Pando, n'Uviéu, el próximu sábadu 26 d'Ochobre a les 12.00 hores.
  
Según informó la mesma Asociación, "les agresiones, el despreciu, el tratalos como seres inferiores son situaciones cotidianes na vida de munchos inmigrantes que residen n'España". En munchos casos, la situación del inmigrante evita que se denuncien estes situaciones.
  
"Los agresores suelen ser elementos antisociales y cobardes que busquen nel inmigrante la víctima fácil ensin posibilidá de defensa. Pero hai que señalar que se ta propagando, per parte de les organizaciones de corte racista y neonazi, el tipu de discursu que da orixe a estos ataques y qu'afala al odiu contra los inmigrantes. Bastante ye que, nel restu d'Europa son individuos escerebraos como l'agresor de Barcelona los que formen los grupos de choque de los partíos racistes", apuntaron.
  
Dende AIRA, critiquen la pasividá de la Delegación del Gobiernu n'Asturies colos grupos que faen campañes permanentes de propaganda contra los inmigrantes. Les pintaes, los cartelos y los panfletos rellacionando a los inmigrantes col paru, la delincuencia y el terrorismu son los que creen el caldu de cultivu pa les agresiones.