Colonos israelinos amenacen con espulsar de les sos cases a palestinos

Un grupu de colonos israelinos de Xerusalén Este amenazaron con espulsar de les sos cases a cuatro families palestines porque, según dicen, tán ocupando un terrenu de xudíos.

Los colonos afirmaron que si estes 40 persones nun marchen antes del próximu 4 de xunetu, van negociar a empreses de seguridá privaes por que les evacuen, según informó'l diariu israelín Haaretz.

Estes families palestines residen nun edificiu qu'anteriormente foi una sinagoga y que ta cerca de Beit Yonatan, el polémicu edificiu de siete plantes onde viven colonos xudíos, construyíu nel corazón d'un barriu -Silwan- mayoritariamente palestín. En xunetu del añu pasáu, un tribunal israelín ordenó la evacuación de Beit Yonatan, pero tovía nun se fixo.
  
Los israelinos que residen en Beit Yonatan señalaron que la Policía nun espulsó a les families palestines por cuenta de restricciones polítiques y alvirtieron que'l mes qu'entra van ocupase ellos mesmos d'esti asuntu. Silwan, onde viven unos 50.000 palestinos y 70 families xudíes, tornón nún de los puntos calientes na disputa ente ambes partes por Xerusalén Este, la parte de Xerusalén que los palestinos quieren tornar na capital del so futuru Estáu.
  
Esti llunes, el Conceyu de Xerusalén aprobó unos planes preliminares pa baltar 22 viviendes palestines en Silwan col fin d'establecer ellí un centru turísticu -con tiendes, restaurantes, galeríes d'arte y un gran centru comunitariu-, una acción criticada por Estaos Xuníos, que considera que nun ayuda a que progresen les conversaciones indirectes ente l'Estáu hebréu y l'Autoridá Palestina. A les 22 families desplazaes va permitíse-yos construyir viviendes n'otra zona del barriu, anque tovía nun ta claro quién va facese cargu de los costos.
 
Palestinos acusaos

Per otru llau, les autoridaes israelines acusaron formalmente esti miércoles a trés palestinos de Xerusalén Este por, presuntamente, disparar once bales en Silwan contra un touterrén nel qu'había había dellos colonos de Beit Yonatan, dexando firíu leve a un guardia de seguridá contratáu poles autoridaes. Los tres tán acusaos d'intentu d'asesinatu, conspioración pa cometer un crime y tenencia illegal d'armes de fueu.
  
Les autoridaes israelines anunciaron esti llunes, depués de que se llevantare'l secretu de sumariu, que'l Serviciu de Seguridá del Shin Bet (el serviciu de seguridá interna israelina) y la Policía d'Israel detuvieren en Xerusalén Este a la persona que presuntamente realizó los disparos y a los miembros de trés "célules terroristes" posiblemente rellacionaos con una serie d'ataques contra civiles y miembros de les fuerces de seguridá israelines en Cixordania. Según la Policía, los sospechosos confesaron que participaron nos ataques, rexistrándose la mayoría en Silwan mientres los últimos meses.
  
Coles mesmes, practicáronse seis detenciones por un incidente asocedíu'l pasáu 2 de mayu, nel que delles persones bloquiaron una cai de Silwan y atacaron un touterrén de les fuerces de seguridá israelines con piedres y cócteles molotov. A lo último, la Policía arrestó a trés sospechosos que podríen tar implicaos nun ataque con armes de fueu nel barriu de Ras al Amud, en Xerusalén Este.