Palacios cifra en 15 los nuevos casos d'asturianos torturaos y desapaecíos

El direutor de l'Axencia Asturiana de Cooperación, Rafa Palacios, alertó de 15 nuevos casos de  descendientes d'asturianos torturaos, asesinaos y desapaecíos n'Arxentina.

Según informó la Conseyería de Bienestar Social y Vivienda, mientres la dictadura militar impuesta n'Arxentina dende'l 24 de marzu de 1976 hasta 1983 y la so represión illegal, ciudadanos asturianos fueron víctimes de sistemátiques violaciones de los Derechos Humanos.

A la llista de más de 30.000 persones víctimes de la Dictadura y la so barbarie, nuevos datos ofrecíos pola Unidá d'Investigación de la Secretaría d'Estáu de DD.HH del Ministeriu de Xusticia y DD.HH de la República Arxentina, sumen 15 nuevos nomes de descendientes asturianos asesinaos y desapaecíos, al archivu de les yá 55 persones de descendencia asturiana o compañeros de les mesmes que l'Axencia tien documentaes.
 
Dende l'añu 2006, con un importe que sube a 160.000 euros, l'Axencia Asturiana de Cooperación al Desarrollu, financia a esta Unidá d'Investigación al traviés de los Programes 'Reconstruyendo memoria' y 'Recuperando Identidá'.
  
Amás de collaborar direutamente colos programes que lleva esta Unidá de la Secretaría d'Estáu de Derechos Humanos n'Arxentina, l'Axencia Asturiana de Cooperación tamién collaboró nel añu 2007 con una financiación de 50.000 euros col Equipu Anatómicu Forense de la República d'Arxentina col fin de buscar y identificar a toes estes víctimes de vulneración de los derechos humanos más elementales.
  
Rafael Palacios destacó tamién, la estrecha collaboración de l'Asociación de Familiares de Desapaecíos del Estáu Español na República Arxentina cola que cuenta l'Axencia en tou momentu.