Rubalcaba diz que la esquierda abertzale nun va tar nes eleiciones

|

Rubalcaba aseguró que se va meyorar la Llei Electoral pa evitar la presencia de la esquierda abertzale. Mientres que’l presidente del PNV diz que Batasuna llama a un altu’l fueu.

Toles declaraciones vienen por mor del actu celebráu’l pasáu domingu, onde Eusko Alkartasuna y la esquierda abertzale roblaron un alcuerdu de collaboración y falaron de la posibilidá de presentase en coalición nes eleiciones municipales del 2011. Nesi sen, el ministru del Interior, Alfredo Pérez Rubalcaba, indicó que "el Ministeriu y los xueces van facer cumplir la Llei dafechu".
   
"Si Batasuna nun ruempe con ETA o la banda nun dexa la violencia del tou, l'Estáu, ye dicir el Ministeriu y los xueces, vamos facer cumplir les lleis. Nun se pue tar nes instituciones pa defender una banda terrorista y fadrémoslo, créame, pa eso tán les lleis, vamos aplicales dafechu", alvirtió'l ministru.
   
A Rubalcaba, que presentó a la firma d'un conveniu col Conceyu de Madrid, preguntáron-y en concreto sobre si la reforma de la Llei Electoral nun será abondo pa evitar la presencia de la esquierda abertzale nes elecciones per medio de les llistes d'EA o otros recursos como les agrupaciones d'electores.
   
"Lo que más me preocupa ye'l discutiniu, los demócrates debatimos  a ver cómo y qué brigueres tien la Llei. Esi debate preocúpame, la Llei ta, vamos meyorala", añadió Rubalcaba, qu'apeló a "la esperiencia" del Estáu "na aplicación de la Llei" y a "la ratificación europea de la Llei per mediu de la sentencia clave del Tribunal de Derechos Humanos d'Estrasburgo".
   
"Con eses armes xurídiques vamos aplicar la Llei pa evitar que tea la xente que nun tenga de tar, porque la democracia cree que nun tenga que tar, porque s'incumple una regla básica", acabó.

Llamáu a l’altu’l fueu

El presidente del EBB del PNV, Iñigo Urkullu, considera qu'existen "determinaos movimientos" na esquierda abertzale que paecen dirixíos a "querer facer un llamáu a ETA pa qu'anuncie un altu'l fueu", y alvirtió que lo que la formación nacionalista reclama ye "el cese definitivu" de la banda.

En cuanto al actu del pasáu domingu celebráu con EA nel Palaciu Euskalduna, preguntó si nun tamos ante "la finiquitación" del proyectu d'EA pa entrar "nuna collaboración diseñada pola esquierda abertzale".
   
Nuna entrevista concedida a Radio Euskadi, recoyida por Europa Press, Urkullu consideró que toles sensibilidaes ideolóxiques tienen de tener "opción" pa tener presencia nes instituciones vasques, y señaló que, "evidentemente, la pelota ta nel teyáu" de la esquierda abertzale. Sicasí, apuntó que ta viendo "un episodiu interesáu" como que'l presidente del PSE-EE, Jesús Eguiguren, ta falando de la llegalización de Batasuna.  
 
 El líder nacionalista afirmó que l'actu d'esti pasáu fin de selmana de la esquierda abertzale y EA foi "un teatru, una escenificación", y afirmó que "equí hai una necesidá de qu'ETA anuncie'l cese definitivu". "A ver si vien cuanto antes, y vamos aplaudilo como hai qu'aplaudilo, pero tolo demás, tolo que puean ser alvertencies de que si vien un anunciu d'altu'l fueu... Yá pasemos por eses esperiencies, yá les tuvimos", recordó.
   
Por ello, reclamó "un cese definitivu per parte d'ETA y eso correspuende a ETA". "Y, nel so casu, sí tamos viendo unos determinaos movimientos nel conxuntu d'esa autodenominada esquierda abertzale no referente a querer facer un llamáu a ETA pa qu'anuncie un altu'l fueu, pero nun ye l'altu'l fueu lo que'l PNV reivindica, sinón el cese definitivu", añadió.

Escenificación
   
Al so xuiciu, "tamos na escenificación d'una estratexa que tou esi mundu de l'autodenominada izquierda abertzale tien dende hai años", y recordó qu'EA yá adoptó "esta estratexa" nel añu 2008.
   
Nesta llinia, consideró "interesao" que n'ochobre del 2009, "xusto'l día nel que nel Congresu de los Diputaos s'aprobare la regularización del Conciertu Económicu, procedió a detenciones de líderes del mundu de l'autodenominada esquierda abertzale, porque supuestamente taben reuníos pa entamar un camín que taba tuteláu por ETA".
   
Urkullu manifestó que "ye interesao cómo naquel momentu se detién a unos cabezaleros políticos", mientres que esti pasáu domingu "hai un actu nel ta Batasuna y nun pasa absolutamente nada".
 
Coles mesmes, recordó que "Eusko Alkartasuna n'agostu del 2008 yá adoptó esta víes, esta estratexa". Nesti sen, en referencia a EA, manifestó que los sos militantes y votantes van tener que dicir "si nun tamos nel proyectu de finiquitación d'un proyectu orixinal" de la formación "pa entrar nuna collaboración estratéxica que ta diseñada dende hai tiempu pol mundu de l'autodenominada esquierda abertzale".
 

Contador Estadistiques