El Principáu lleva a Shanghai la so nueva imaxe nel mundu

Areces presentó en Shanghai la nueva campaña ‘Asturies, dizlo tol mundu’, afirmando que nel esterior hai que dir con España “porque Asturies nun tien tamañu". Mientres, Exceltur asitia'l nuesu país como la tercer comunidá menos competitiva.

El Principáu presentó güei na EXPO de Shanghai, que celebra’l Día d'Honor d'Asturies, la nueva imaxe de promoción d'Asturies nel mundu, que según indiquen dende’l Principáu,  va dar pie a la nueva campaña turística y de promoción de la “marca” en diversos ámbitos comerciales y empresariales al traviés de la mirada de persones foriates.

Ente les venticinco personalidaes que participaron nel audiovisual colos sos testimonios sobre Asturies, atópense ; Stephen Hawkin (Científicu); Sabine Christiansen (Periodista de la CNBC); Fredrik Gillstrom (Direutor Xeneral d'ADAMO); Ainhoa Arteta (Sopranu); Gerhard Stahl (Secretariu Xeneral del Comité de les Rexones); Ben Skinner (Campeón d'Europa de Surf); Robert Brown (Ex direutor del FMI y del Bancu d'Inglaterra); Theo Vanderloo (Country-Head de Bayer); Damien Pwono (Direutor del Aspen Institute); Laurence Straus (Profesor de la Universidá de Nuevu Méxicu); Matthias Meissner (Presidente deWWFA); Torsten Gessner (Xefe d'Operaciones de ThyssenKrupp Elevator); Jean Marie Auel (Autora de la saga Los Fíos de la Tierra); Ian Hudson (Presidente de DuPont pa Europa, Mediu Oriente y África); Thomas Friis (Vicepresidente del European Economic Forum); Víctor Manuel San José (Cantante y productor); Alfonso Quiñonez (Secretariu executivu de la OEA); Antonio Tajani (Vicepresidente de la Comisión Europea); Adam Austerfiel (Director de la London School of Economics); António Mexía (CO de EdP); Lauren Green (Periodista de Fox News); Vint Cerf (Vicepresidente de Google); Rick Stein (Cocineru y comentarista gastronómicu de la BBC); Woody Allen (Director de cine) y Hannah Collins (Fotógrafa)

Esti trabayu va sirvir pa promocionar Asturies de forma coordinada nos ámbitos turísticu, económicu, empresarial y cultural. “Grandes firmes comerciales optaron nos últimos años por una unificación de la so imaxe, semeyante a la que se presentó güei, pero ye la primer vegada qu'una marca de territoriu adopta esta estratexa”, solliñaron dende Presidencia..  

Pa la so execución, realizáronse grabaciones en 12 ciudaes del mundu. Tolos prescriptores qu'apaecen nel audiovisual participaron de forma desinteresada. La campaña de promoción turística va incorporase esti mesmu branu, reforzándola con valles publicitaries, cartelería y merchandising.

Asturies con España como marca

Areces afirmó na presentación de la campaña en Shanghai, qu’Asturies va tres la marca España nos destinos internacionales, “porque Asturies nun tien tamañu abondu pa crear una marca propia”.

“Lo primero ye que los chinos entren n'España y depués atrayer con un productu turísticu estremáu del que tradicionalmente se conoz n’España., de sol y sablera”, afirmó. “Nel esterior tenemos que dir con Turespaña y el nuesu país”, dixo’l Presidente asturianu sobre les campañes promocionales d’Asturies nel mundu.
 
Tercer comunidá menos competitiva
 
Asturies ye la tercer comunidá menos competitiva nel sector turísticu, solo per delantre d'Aragón y Estremadura, según l'estudiu ellaboráu pola Alianza pa la Escelencia Turística (Exceltur) en collaboración con Deloitte, que se presentó güei nel marcu d'unes xornaes dedicaes al turismu na Universidá Internacional Menéndez Pelayo (UIMP) de Santander.
  
Pela contra,  País Vascu, la Comunidá de Madrid y Cataluña, por esti orde, encabecen el primera ránking de Competitividá Turística por Comunidaes Autónomes, 'MoniTUR' 2009.
  
A estos trés comunidaes sígenlu Andalucía, Baleares, Canaries, Comunidad Valenciana y Galicia, yá nel octavu puestu. A metá de tabla, tán Navarra (9ª), La Rioxa (10ª), Castiella-La Mancha (11ª), Castiella y Lleón (12ª), Murcia (13ª) y Cantabria (14ª).
  
El vicepresidente d'Exceltur, José Luis Zoreda, destacó qu'esti estudiu ye "pioneru" a nivel mundial, dao que trata dende 29 ámbitos distintos el principal problema de los destinos turísticos n'España, como ye la so situación nel mercáu, coles mires de "poner en valor" los recursos necesarios que permiten al sector y a l'Alministración meyorar la so competitividá.
  
Zoreda esplicó que toles comunidaes presenten aspeutos "claros" de meyora, ensin diferencies abismales, dao que la so posición de lideralgu en ciertos ámbitos nun evita una peor clasificación n'otros aspectos.
  
No referente a Asturies, el turismu ye una prioridá nes polítiques del Gobiernu autonómicu, xunto colos de La Rioxa y Galicia, frente a otres como Cataluña, Castiella y Lleón, y Estremadura.
 
Promoción del país ensin la llingua del país