Suatea esixe que les oposiciones nun dependan del Adolfo Posada

Suatea diz que los opositores a maestros d’ESO tán sufriendo la mala xestión del Institutu Adolfo Posada. Poro, amuesen la so oposición a que la organización seya del Institutu.

El sindicatu diz que Conseyería d'Educación queda al marxe del procesu, “cuando tendría de ser de la so esclusiva competencia al ser del máximu interés pal futuru de la enseñanza pública asturiana”.

La mala xestión, según Suatea, queda definida en que tovía los opositores nun saben cuando ye l'exame y tán ensin constituyir los tribunales d'oposición. El sindicatu diz qu’Asturies ye la única comunidá onde s'obliga a los miembros del tribunal a repetir en convocatories consecutives. “Recordamos que tamién ye la única comunidá onde ye l'alministración la que noma direutamente dos miembros del tribunal”, afirmen.

Al empar, ye’l únicu territoriu nel qu'hai un sortéu pa designar los temes d'oposición, “ún distintu per cada Tribunal y non por especialidá”.  Tamién indiquen que mientres na mayoría de les comunidaes garantízase l'anonimatu de el opositores al traviés de distintos procedimientos, n’Asturies nun esiste garantía d'anonimatu.

El sindicaru califica d’intolerable la situación, afirmando que perxudica a opositores, miembros del tribunal y tola comunidá educativa. “Tou esto ye consecuencia de la negativa del Institutu Adolfo Posada a axustar toos estos aspeutos, de vital trescendencia pa los opositores nuna Mesa Sectorial d'Educación”, señala Suatea.