UNA pide la suspresión del Festival Aereu de Xixón

Unidá Nacionalista Asturiana (UNA) pide la supresión del Festival Aereu de Xixón como midida d'austeridá y desixe que se diga públicamente cuanto va costar a los xixoneses.

La vocera d’UNA en Xixón, Yolanda González, afirma que, “amás de ser un espectáculu de corte militarista sustituible por otros más baratos y constructivos, supón un auténticu espilfarru en momentos nos que se plantega una baxada del gastu y nel que s'aplicaron importantes retayos a la política de festexos d'esti branu”.

González camienta que nestos momentos nos que s'intenta concenciar a la ciudadanía de la necesidá de recortar los gastos, “qu'en munches ocasiones afecten a servicios básicos ya infraestructuras”, ye un marafundiu que se celebre un festival aereu con un costu altu, “que nun tien nengún raigañu na nuestra ciudá, que perxudica al mediu ambiente y que convierte la sablera nel escenariu d'una parada militar”.

Nesti sentíu, la vocera d’UNA tamién quixo llamar l'atención sobre la falta d'información sobre les cuentes del festival, del que'l Conceyu ye patrocinador principal, y pidió que se faigan públiques les cuentes del mesmu. "N'otres ciudaes suspendiéronse espectáculos semeyantes polos sos altos costos, que perpasen los 60.000 euros", señaló.

Al traviés de Yolanda González, la organización sumóse a les crítiques de la Asociación Inxenieros ensin Fronteres, que pidió la eliminación del festival del calendariu xixonés pol so calter militarista. “El conceyu ta retayando n'espectáculos d'otru tipu y calteniendo un Festival que se basa na exhibición d'armamentu militar destináu a esaniciar vides humanes”, solliñó pa finar.

El Festival Aereu de Xixón va celebrase esti próximu dómingu 25 de xunu na sablera xixonesa de San Llorienzu.