Francisco de Asís resulta reelexíu como secretariu xeneral del PCA

Francisco de Asís resultó reelexíu como secretariu xeneral del Partíu Comunista d'Asturies (PCA) nel l'IX Congresu, que se celebró esta fin de selmana na Facultá d'Económiques d'Uviéu.

Un total de 137 delegáu participaron na elección del Comité Executivu central, de los que 127 votaron sí a la llista presentada y 10 votaron en blancu. Una vegada axuntáu'l Comité, este escoyó a Francisco de Asís como nuevu secretariu xeneral por 60 votos a favor y 3 en blancu. El Congresu cuntó cola presencia del ex secretariu xeneral del Partíu Comunista d'España (PCE), Francisco Frutos.

Este ye'l segundu congresu nel que ye escoyíu De Asís, tres les divisiones internes nel partíu, especialmente visibles ente Francisco de Asís y l'anterior secretaria xeneral del PCA y conseyera de Bienestar Social y Vivienda del Principáu con IU, Noemí Martín.

De Asís diz qu'encara esta nueva etapa "ilusionáu" y afirma que la formación "ta abierta al diálogu" con IU d'Asturies pa restaurar un proyeUtu políticu común na comunidá, tres les confrontaciones que vivieron nos últimos tiempos.

"Ye bien sabíu que n'Asturies tamos escluyíos", dicía ayeri De Asís mientres la primer xornada del Congresu. Por eso, afirma que sigui apostando por promover una integración "con plenes garantíes democrátiques". Sicasí, entiende qu'esi escenariu solo ye posible "con voluntá política per dambes partes", una voluntá que dixo "enagora nun esiste dientro d'IU d'Asturies".

De Asís espera que pueda llegar l'alcuerdu, entá ye más ante les elecciones de 2011. "Tamos dispuestos a participar en tol procesu de refundación d'IU", confirmó, anque alvirtió que si non se consigue l'alcuerdu "va haber que plantegar a la dirección del PCE que tome dalgún tipu de midida porque los comunistes asturianos nun quedemos sentenciaos a tar fuera de les instituciones".