UNA alvierte de la creación d'un mercáu dual de la vivienda

Unidá Nacionalista Asturiana alertó de la creación d'un mercáu dual de la vivienda, onde la nueva construcción aumenta de preciu y les baxaes de preciu concéntrense na vivienda usada.

Según informó'l voceru de vivienda de la organización, Daniel Fernández, "esti datu muestra que la Conseyería de Vivienda, dirixida por IU, sigue apostando por construyir más viviendes nueves primero que sacar al mercáu les de segunda mano, lo que contribúi a caltener el carácter especulativu y irracional del mercáu de la construcción residencial". Nesti sen pidió un xiru na política d'ayudes.
  
Asina Fernández destacó los datos del INE (Institutu Nacional d'Estadística) del primer trimestre del 2010, onde se recueye que "la vivienda nueva subió un 3,81 por cientu'l so preciu sobre'l 2007, mientres que la de segunda mano baxó'l  so preciu un 6,89 por cientu, lo qu'a pesar de los discursos teóricos, nun ye más qu'otra muestra de que les midíes de Noemí Martín a favor de sacar al mercáu les viviendes que promotores y constructores teníen en stock, perxudica gravemente a les persones que se vieron obligaes a vender una vivienda usada".
    
El voceru de vivienda d'UNA dixo que "la política d'IU, que ye la d'esti Gobiernu, ye patente na midida de conceder ayudes pa responder por hipoteques destinaes a mercar viviendes nueves que tuvieren disponibles a partir del 1 de xineru del 2009, qu'evidentemente foi un fracasu porque les persones que precisaríen tal aval nun podíen dexase mercar una vivienda d'esti tipu, pero de xuru si podríen mercar una vivienda usada". Fernández añadió que "la nuesa Conseyera niégase a dar ayudes a la vivienda usada que sí concede p'acabar col stock de pisos de promotores y constructores".
  
Al respeuto de la política d'ayudes, UNA considera que "lo más grave" d'esta situación ye que se ta consolidando un mercáu dual qu'utilizando como base les ayudes públiques fai que se construyan viviendes nueves, que nun ven reflexada nel so preciu la crisis inmobiliaria, mientres aumenten les viviendes vacíes de segunda mano que sí sufren en tola so dimensión l'axuste de preciu de la crisis ante la falta d'ayudes públiques".
  
Amás "la diferencia de preciu ente vivienda nueva y usada nun va llevar apareyáu un aumentu de la demanda de la vivienda de segunda mano, porque esa diferencia de preciu ta asumiéndola l'Alministración al traviés de distintos tipos d'ayudes". Asina, acabó Daniel Fernández, ye necesariu un xiru na política d'ayudes que ruempa esti enclín qu'apuesta por un mercáu inmobiliariu claramente especulativu y irracional, construyendo viviendes que "nun son necesaries col costu económicu, medioambiental y social qu'ello supón".