Delegaos sindicales ocupen la Conseyería de Facienda

Unos 80 delegaos sindicales de l'alministración, en representación d'UXT, CC.OO, ANPE y dellos cuerpos policiales ocuparon la planta baxa de la Conseyería de Facienda.

L’actu entamó contra'l retayu salarial del 5% a los emplegaos públicos, aprobáu pol Gobiernu central y que va tener que ratificar nun próximu plenu la Xunta Xeneral del Principáu.

Según informó ún de los delegáu, Luis Fernández Lleón secretariu de Política Educativa de la Federación d'Enseñanza de CC.OO, los delegáu llegaron sobre les 10.15 y van permanecer ellí hasta que la Policía entame a desabellugalos. Valiéndose de pitos  y bocines, los zarraos tán produciendo un gran xaréu dientro de les instalaciones.

En pallabres de Fernández, trátase de "una midida más de les que tamos realizando contra los retayos salariales que faen pagar a los emplegaos públicos les consecuencies d'una crisis de la que nós nun tenemos nenguna culpa".

Asina, van siguir coles midíes de movilización en marcha. "Va haber concentración ante la Xunta cuando alderiquen sobre’l decretu, y va haber una manifestación pal día 30 de xunu", recordó.