Israel estudia suavizar el bloquéu sobre Gaza

Israel ta estudiando distintes formes pa suavizar el so bloquéu sobre la Faza de Gaza, según afirmó esti martes el ministru de Bienestar israelín, Isaac Herzog.

El ministru hebréu calificó de contraproducente la política actual, confirmando asina los comentarios realizaos ayeri pol unviáu especial del Cuartetu pa Oriente Próximu, Tony Blair, sobre qu'Israel podría eliminar esti bloquéu.
  
"Ye hora de poner fin al zarru na so forma actual. Nun da nengún valor a Israel. Dende un puntu de vista diplomáticu, causa grandes problemes d'imaxe", declaró a la radio israelina Herzog, que señaló qu'Israel informó a Blair que pretende "permitir un pasu fluyíu de bienes" a la Faza de Gaza.
  
"De momentu, tán trabayando nos detalles técnicos (...) d'una fórmula que tamién torgaría'l contrabandu de munición a la Faza de Gaza", detalló Herzog.
  
Blair indicó ayeri qu'Israel alcordara un compromisu de principiu pa entamar a eliminar el bloquéu sobre Gaza "en díes". Nes sos declaraciones, Herzog nun dio un periodu de tiempu pa revisar la política.
  
La XE quier qu'Israel cambie la so política de prohibir la entrada de numberosos suministros en Gaza, nun siendo unos pocos, pola d'adoptar una política d'aceptar tolos productos y prohibir namás los proscritos nuna llista y con un estrictu control de les importaciones.