Cameron pide perdón pola matanza del 'Domingu Sangrientu'

|

David Cameron calificó de "inxustificable" la muerte de 14 manifestantes en xineru de 1972 por disparos del Exércitu británicu en Derry y "en nome del Gobiernu" pidió perdón.

El primer ministru británicu espresóse asina mientres la presentación ante la Cámara de los Comunes de les conclusiones de la investigación sobre'l llamáu 'Domingo Sangrientu' ('Bloody Sunday').
"Nun se defende al Exércitu británicu defendiendo lo indefendible", declaró Cameron mientres la presentación de les conclusiones de la investigación de Lord Saville. "En nome del Gobiernu y de tol país, siéntolo fondamente", afirmó Cameron.
  
L'informe, que se fai públicu doce años depués de que l'entós primer ministru, Tony Blair, ordenare una investigación sobre la matanza, indica que tolos manifestantes muertos aquel 30 de xineru de 1972 yeren inocentes y taben desarmaos, que los soldaos abrieron fueu sin previu avisu y "inorando les ordes", admás de qu'algunos de los muertos "taben fuxendo o ayudando a otros".
 
El documentu tamién indica que l'actual vizprimer ministru d'Irlanda'l Norte, Martin McGuinness, taba presente nel llugar cuando se produxo la masacre y "probablemente taba armáu con una ametralladora", pero nun cometió "nengún actu que xustificare que nengún de los soldaos abriere fueu".
  
Según l'informe lleyíu por David Cameron, los soldaos recibieren una orde que nun cumplieron y los primeros en disparar fueron los mesmos militares británicos. Nengún de los muertos tenía un arma de fueu nesos momentos y nun hubo, poro, nenguna xustificación pa disparar a civiles. "Nun hai ambigüedaes, foi inxustificáu y inxustificable", señaló.

Contador Estadistiques