El Gobiernu asturianu activa otra vuelta'l Plan d'Inundaciones

El Principáu activa otra vuelta'l Plan d'Inundaciones(PLANINPA), en situación '0', a la vista del estáu de les cuenques hidrográfiques, y ante les predicciones meteorolóxiques.

Esti nivel supón que toles incidencies tán controlándose colos medios y recursos de les árees afeutaes, según informó'l 112-Asturies .La situació vien poles preicciones remitíes pola Axencia Estatal de Meteoroloxía y la previsión de la pleamar a les 19.30 hores, con un altor d'unos cuatro metros.
 
Nes instalaciones de La Morgal, constituyóse'l Centru de Coordinación Operativa (CECOP) nel que tán presentes, el director d'Interior y Seguridá Pública, Valentín Ruiz García, el xerente de la Entidá del 112 Asturies, el Xefe de la Área de Coordinación, el Xefe Supervisor de Bomberos d'Asturies y miembros del Departamentu de Protección Civil del 112-Asturies.  
  
Amás, dende'l 112-Asturies alertóse de la situación a la Delegación de Gobiernu n'Asturies, a los Conceyos y organismos susceptibles d'intervenir.
 
El Principáu pide ayudes al Estáu
 
El Conseyu de Gobiernu va aprobar mañana na so xunta selmanal una solicitú d'ayuda al Gobiernu d'España ante los daños provocaos pola aguada de los últimos díes.
 
La vocera del Principáu, Ana Rosa Migoya, anunció esta mañana la decisión del Executivu asturianu al amparu del Real Decretu de 2005 nel que se preven ayudes y subvenciones pa determinaos casos d'emerxencia como ésti. “Entendemos qu'eses ayudes son necesaries pa la restauración, tantu de bienes de titularidá pública como privada”, esplicó la Conseyera.

Ana Rosa Migoya adelantó tamién que'l Direutor Xeneral d'Alministración Local, José Luis Montes, va axuntase de forma conxunta colos alcaldes de los conceyos más afeutaos pola aguada.
 
Asaja pide al Estáu midíes urxentes
 
L'Asociación Agraria de Jóvenes Labradores (Asaja) solicita al Gobiernu Central la toma de midíes urxentes pa eliminar los daños causaos nel sector agrariu, pola intensa aguada que se produxo mientres los últimos díes n'Asturies.
  
Según informaron al traviés d'una nota prensa, Asaja envió una carta al delegáu del Gobiernu n'Asturies, Antonio Trevín, na que piden que s'adopten midíes pertinentes, y se pongan en marcha los mecanismos oportunos pa compensar les perdes sufríen tanto nel sector agrícola como ganaderu.
  
Coles mesmes, l'Asociación confía en que la so reivindicación l'asuman tamién el conseyeru de Mediu Rural y Pesca del Principáu, Aurelio Martín, y qu'entame los contactos oportunos pa que s'habiliten compensaciones a los damnificaos.
  
Ente los desperfectos causaos poles lluvies, Asaja destacó les inundaciones nos cultivos, asina como los daños nes infraestructures de les esplotaciones agraries. Amás, les plantaciones de maíz tán prácticamente destruyíes, según apuntaron.