El Bloque sofita la manifestación en defensa de les Cuenques

Ante la manifestación convocada por CC.OO y UXT en defensa de les Cuenques Mineres, el Bloque por Asturies del Nalón y del Caudal, fai un llamáu pa participar na convocatoria.

La organización diz que considera qu’esisten razones pa esta convocatoria. Asina, “el paru nes Cuenques algamó cifres  bien esmolecedores, les empreses creaes al calor de los fondos mineros, atraviesen serios problemes, sufriendo dellos ERES, cuando nun tán avocaes al piesllu si daquién nun lo torga, como ye'l casu de Venturo XXI”.

A lo que añaden los efeutos del “decretazu” del gobiernu del PSOE, “que va traer consigo amenorgar los ingresos de funcionarios y pensionistes, treslladando los sos efeutos al consumu d'estos sectores y, poro, a la marcha del sector servicios y al empléu soportáu por ésti”.

El Bloque diz que tamién s'espera que'l retayu aprobáu de la inversión afeute al desenvolvimientu del Plan del Carbón, “colo cual munches de les inversiones previstes nun se van facer o, nel  meyor de los casos, van sufrir importantes demores”.

“Tou ello forma un panorama absolutamente desolador que va acentuar, inda más, la constante sangría demográfica que vienen sufriendo les nueses Cuenques”, afirmen.

Poro, sofiten la convocatoria d’ UXT y CC.OO pal xueves 17 de xunu a les 19.30 hores en Mieres, y llamen a la población a participar masivamente.