CC.OO: "habrá fuelga xeneral"

CC.OO anunció que va haber fuelga en protesta pol decretu de reforma llaboral presentáu pol Estáu, pero encamentó esperar al martes pa saber la fecha de la convocatoria.

Asina lo avanzó en rueda de prensa'l responsable de comunicación del sindicatu, Fernando Lezcano, a partir de les opiniones espresaes polos secretarios xenerales de les federaciones de CC.OO reuníes mientres la mañana en Conseyu Confederal.

"Poles intervenciones que tuve ocasión d'escuchar (nel Conseyu) antes de comparecer pueo adelantavos que va haber güelga xeneeral", indicó Lezcano antes de concretar qu'hubo "unanimidá" al respecto.
  
Nesti sen, Lezcano recordó qu'esti órganu consultivu ye l'encargáu nos sindicatos mayoritarios de mandatar a les correspondientes comisiones executives confederales la toma de decisiones sobre la güelga xeneral.
  
Les comisiones executives de CC.OO y UXT van reunise mañana, colo que previsiblemente los secretarios xenerales d'ambes organizaciones, Ignacio Fernández Toxo y Cándido Méndez, van dar a conocer los detalles de la güelga na comparecencia programada pa les 17.00 hores, una vez acabaes les xuntes.
  
"No que fai referencia a les feches, van dase a conocer mañana, igual que se va dar a conocer el percorríu que se va siguir pa preparar esa güelga xeneral, ente otres razones porque tenemos un oxetivu precisu y ye garantizar l'ésitu d'esa convocatoria de tal manera que nun conlleve interpretaciones interesaes nes que munches veces paezmos vez un interés inesperáu por cuestionar el papel de los sindicatos", añadió.
  
Pa CC.OO, "una fuelga xeneral ye algo demasiao serio como pa tornala nun espatuxu". "La fuelga xeneral ye l'últimu recursu y requier d'una preparación correcta. Nun se convoca nin por decretu nin per corréu electrónicu, quier dicir debate y esplicación de la situación", atayó Lezcano.
 
Nesti contestu, Lezcano aseguró nun conocer con certeza si'l Gobiernu ta recurriendo a los grupos parlamentarios, especialmente a CiU, pa endurecer tovía más la reforma llaboral, pero adelantó que los responsables institucionales de CC.OO y UXT yá tán trabayando p'acordar alcuentros coles fuerces polítiques pa tratar de "producir el fenómenu inversu", el de "aliviar" el decretu antes de la so aprobación el próximu miércoles y, en cualquier casu, de cara a la so convalidación el 22 de xunu.
  
No referente a la posibilidá de que'l PSOE tea presionando pa que CiU faiga más dura la reforma, Lezcano consideró qu'ello sería "ocioso", puesto que la formación catalana "caracterízase por representar los intereses de determinaos sectores empresariales". "Nun sé por qué l'afalen si de 'motu propio' van facelo", repostió.
  
A lo último, el voceru de CC.OO aseguró que'l documentu de reforma llaboral del Gobiernu "ye más sensible a los pidimientos de los empresarios" y supón, igual que'l decretu de midíes de reducción del déficit, "un xiru sustancial" nes polítiques del Executivu.
  
Amás, CC.OO vuelve a la carga en contra de les propuestes del Gobiernu pa reformar el sistema de pensiones a la vista de que "tán apaeciendo con renovada fuerza".
  
"El Gobiernu escuchó más pela oreya derecha que pela izquierda, igual que col plan d'axuste empezó a gobernar más cola mano derecha que cola esquierda", acabó'l voceru de CC.OO.