Buendía estima en tres millones los daños poles llenes nes carreteres

Francisco González Buendía afirmó que’l so Departamentu valora en tres millones d'euros los daños provocaos hasta'l momentu poles llenes nes carreteres de titularidá autonómica.

El Conseyeru de Mediu Ambiente, Ordenación del Territoriu ya Infraestructures dixo qu’anque inda se tán evaluando los daños, el serviciu de Caltenimientu de la Direición Xeneral de Carreteres calcula que va ser necesariu desendolcar llabores d'arreglu que van superar este importe.

Buendía fixo estes declaraciones mientres la visita que realizó al conceyu de Gozón, xuntu col Alcalde del conceyu, Salvador Fernández Vega, y na que revisó delles de les carreteres autonómiques afeutaes pola aguada de los últimos díes.

El Conseyeru recordó qu'esti conceyu foi'l más afeutáu, yá que precisó intervenciones en 16 víes, nes que se produxeron desperfeutos qu'algamen el millón d'euros. Nesti momentu, nel conceyu de Gozón, permanez cortada la carretera AS-328, que va al Cabu Peñes, nel puntu quilométricu 2.700; y la GO-15 de San Xuan de Nieva-Les Aceñas, que da accesu a la sablera de Xagó, magar qu s'espera que quede abierta al tráficu a primer hora de la tarde.

A estes hores nel restu de la rede autonómica d'Asturies, hai cortes de tráficu en tres carreteres: na FR-6, Arancedo-Llebredo, nel puntu kilométricu 2.700 nel conceyu d'El Franco; na AS-35 ente Villayón-Bual nel puntu kilométricu 24.200; y na AS-331, ente Pola de Siero y l'Altu del Infanzón, en Xixón, nel puntu kilométricu 9.500.