Buendía manifiesta la so confianza nos imputaos

Francisco González Buendía  manifestó la so confianza, "nel planu moral, políticu y profesional", nos tres altos cargos  imputaos nel casu de los minipisos de la Llaboral.

El conseyeru de Medioambiente, Ordenación del Territoriu y Infraestructures aseguró nel Conceyu de Xixón que tanto l'actual director xeneral de la Zalia, Enrique Álvarez, como los directores xenerales d'Urbanismu y Patrimoniu, Guillermo Morales y Javier Uría, respectivamente, tomaron les decisiones como conseyeros d'una sociedá. Coles mesmes, Buendía afirmó que les decisiones dientro d'una sociedá tómense en base al asesoramientu de los órganos que manden la citada sociedá.
  
González Buendía, que manifestó amás el so enfotu na xusticia, como última instancia que tien de tomar la decisión final, confió en que too s'esclare cuanto antes.