L’Estáu pon a disposición del Principáu los sos recursos

Vicente Álvarez Areces dixo que yá se taben evaluando los daños de les llenes, “agora vamos tratar d'ayudar colos recursos esistentes, tamién por parte del Gobiernu d'España”.

El presidente del Principáu refirióse güei a les aguaes de los últimos díes, tres la visita a les nueves instalaciones del Centru de Tecnificación Deportiva de Tresona en Corvera. Areces dixo que foi una situación verdaderamente bien intensa y en bien pocu tiempu, “lo importante, dientro de la desgracia que suponen los fechos d'A Veiga, ye que nun hubiera más víctimes”.

Sicasí, el xefe del Executivu afirmó que'l momentu culminante foi va dos díes y agora ta normalizándose la situación y evaluando los daños. “Vamos facer el máximu esfuerzu pa poder ayudar”, dixo Areces

El presidente reconoció l’esfuerzu lleváu a cabu polos servicios municipales, autonómicos y del Estáu, “hai xente que lleva ensin dormir prácticamente dos díes, a tolos servicios de protección qu'ayudaron dende'l primer momentu hai que da-yos les gracies porque consiguieron actuar con una gran eficacia".

Del mesmu mou, Areces dixo que’l Principáu diba actuar con tolos recursos disponibles y cola coordinación del Gobiernu del Estáu. “Ayeri llamábame la Vicepresidenta primera del Gobiernu, tamién Elena Espinosa que taba en Bruxeles, pa poner a la nuesa disposición cualesquier que precisáramos”, solliñó.