Xega entama delles actividaes pa conmemorar el 28 de xunu

Xega entama delles actividades pol Día del Arguyu LGTB. Unos actos qu’entamen esti sábadu 12 de xunu y que van finar el próximu 28 cola manifestación del Arguyu 2010.

Esti sábadu 12 de xunu yá va celebrase la primera actividá cola proyeición del documental ‘Bisexualidá, too un arte’, una produición belga dirixida por Freddy Coppens. Sedrá nel Conceyu Abiertu d’Uviéu, na Cai Gascona 12, baxu A.

Una seLmana depués, el sábado 19, y nel mesmu llugar, va proyeutase ‘Plegaries pa Bobby’, una película dirixida por Russell Mulcahy en 2009. Nel posterior alderique va participar J.M. Ruiz Marcos, escritor y ‘Triángulo Rosa’ de XEGA en 2004.

El vienres 25 de xunu a les 20.00, va presentase’l llibru ‘Deseo y resistencia. 30 años de movimiento lesbico en el Estado español’ de Gracia Trujillo. Va ser nel xixonés Café La Cuestión.

Mientres que'l 28 de xunu, Día Internacional de Lesbianes, Gais, Transexuales y Bisexuales (LGTB), va facese l’actu político-institucional a les 19.30 nel Antiguu Institutu de Xixón. Darréu de les intervenciones de les fuerces polítiques, sindicales y sociales, van entregase los Premios 'Ladrillo Rosa', 'Triángulo Rosa' y del XIII Concursu de Carteles de Xega.

A les 21.00 hores va entamar la manifestación del Arguyu LGTB 2010, que va percorrer les cais de Xixón, dende la cai Xovellanos hasta la Plaza Mayor. Al finar l’actu, va lleese’l manifiestu del 2010, dedicáu a la igualdá de los transexuales.