Softastur y l'Ayuntamientu de Llangréu ponen en marcha un Install Party d'Ubuntu na Casa la Cultura de Sama

La Casa la Cultura de Sama (Llangréu) va acoyer una sesión d'instalación d'un sistema operativu n'asturianu'l próximu vienres 16 de xineru dende les 17 hores. L'Asociación Softastur y l'Ayuntamientu de Llangréu organicen esta Install Party de la distribución Linux Ubuntu. L'enfotu ye instalar a tolos y toles interesaos un sistema operativu que-yos permita manexar un ordenador dafechamente n'asturianu.

Col sistema operativu Ubuntu pue facese cualesquier xera, como restolar per Internet, ver videos, oyir música, escribir documentos, mandar/recibir e-mails, ver/editar semeyes, descargar música/películes, chatear... y too ello n'asturianu, ensin virus y de baldre. Softastur ye una plataforma de programadores y traductores en llingua asturiana dedicada a la traducción y desarrollu de software llibre n'asturianu.

Trátase d'una iniciativa de calter cívicu que traduz al asturianu programes de códigu llibre y que recibió esti añu 2008 el Pegollu nos premios Andrés Solar que concede la Xunta pola Defensa de la Llingua Asturiana. Softastur vien trabayando cuantayá na traducción d'aplicaciones de Software Llibre a la Llingua Asturiana y, amás del sistema operativu Ubuntu, ye tamién la responsable de la traducción del navegador Firefox ente otros. La instalación pue facese nuna nueva partición, colo que nun se tien de desaniciar nin renunciar al sistema operativu que se tenga. La sesión ye abierta y de baldre y tamién se convida a asistir a tola xente interesao en saber en qué consiste Ubuntu pa que dempués puedan decidir si quieren instalar esti sistema operativu o non.