Suatea califica de “mazazu” la nueva política presupuestaria

Suatea diz que l’aprobación pol Principáu de los cambeos na Llei de Presupuestos supnen un “mazazu” pal personal emplegáu públicu. Poro, vuelve llamar a la movilización.

El sindicatu diz qu’a los retayos aprobaos pol Gobiernu central pretenden añadir amenorgamientos qu'algamen en dellos conceutos casi'l 10% de los sueldos y trienios ente otros  

De los 28 millones d'euros que se van amenorgar según lo aprobáu nel Conseyu de Gobiernu nun se sabe cuantu-y tocará a la Conseyería d'Educación, “lo que sí sabemos ye que va salir perdiendo l'atención educativa y el profesoráu, una parte que va perder los sos empleos y l'otra que va ver empioraes les sos condiciones llaborales”.

Pa la organización sindical, lacrisis ta siendo utilizada pol Gobiernu asturianu pa cargar contra'l  profesoráu y el restu de trabayadores del sector públicu. Amás, falen de midíes propagandístiques, “como la entrega al alumnáu de 5º de primaria d'ordenadores personales tres díes antes d'acabar les clases”.

Suatea fai un llamáu pa “lluchar” pa evitar que  retayos. “La resignación frente a estes polítiques namás pue contribuyir a reforzar la posición d'un Gobiernu empeñáu en facer caxa a cuenta de los servicios públicos”.

Poro, repiten el llamamientu a la movilización contra estes polítiques asina como contra la reforma llaboral “que Zapatero pretende imponer y que la so implantación namás va producir más paru y más miseria pa los trabayadores”.