La mariña central castigada pol temporal

Gozón pide que'l conceyu se declare zona catastrófica. Mientres n’Avilés paren la producción na fabrica d’Alcoa y en Xixón derrumbase'l techu del Xulgáu de primer Instancia númberu 2.

L'alcalde del Conceyu de Gozón, Salvador Fernández, va pidir que'l conceyu se declare como zona catastrófica, depués de que la zona rexistrare algunos de los mayores desperfectos por mor de la intensa agua cayida na zona dende la tarde d'ayeri.
  
Según indicó'l rexidor gozoniegu, "el primer pidimientu pasa per llograr efectivos qu'ayuden al conceyu a recuperar la normalidá", anque de momentu sigue lloviendo na zona.
  
"Lo primero de too precisamos efectivos y medios pa tratar de poner orde", dixo l'alcalde, qu'esplicó qu'hai zones como Bañugues, Verdicio o'l Molín del Puerto, o en Samartín de Podes, que se vieron seriamente estropiaos. Nesti sen recordó que na pasada nueche l'helicópteru de Salvamentu tuvo que rescatar a persones que quedaron atrapaes y son munches les carreteres que se vieron afectaes.
  
Salvador Fernández agora que les reclamaciones y los gastos van ser "bien altos" y el Conceyu nun tien capacidá p'atender a toos ellos. "Tenemos carreteres peles que nun se pue pasar y eses coses hai que resolveles cuanto antes. Por eso solicitamos ayuda a otres alministraciones", dixo.
 
Derrumbase'l techu del Xulgáu

Les intenses precipitaciones cayíes provocaron el derrumbe del techu del Xulgáu de primera Instancia y Instrucción númberu 2 de Xixón na cai Prendes Pando.
  
Los funcionarios que s'atopaben nel xulgáu agospiáronse na biblioteca del edificiu sin sufrir nengún dañu. Tan solo hubo que llamentar dellos daños materiales, como ordenadores y moblame.
  
Per otra parte, los bomberos controlen una balsa d'agua nel esterior de los Xulgaos de lo Social del Tribunal Superior de Xusticia d'Asturies n'Uviéu pa evitar la entrada d'agua nel edificiu, según les mesmes fontes.

Alcoa para la producción

La fábrica d'aluminios galvanizaos d'Aloca en San Xuan de Nieva (Avilés) paró la so producción a les 06.00 hores d'esta madrugada por cuenta de un importante incidente causáu pol agua na zona. La compañía declaró Fuerza Mayor.  
  
L'agua algamó la subestación eléctrica, lo que provocó'l corte de suministru a les series. Esto fízose de manera controlada col fin d'acortar los riesgos pa emplegaos y pal mediu ambiente.  
  
La compañía ta analizando la situación y adoptando les midíes necesaries pa restaurar l'actividá de la planta asina seya posible. Por cuenta de la naturaleza y seriedá de la situación, asina como a la rocea actual al respecto de cuándo va ser posible reiniciar la producción.