La XIV Fiesta de la Oficialidá tendrá a Xune Elipe de pregoneru

La XIV Fiesta de la Oficialidá de Bimenes yá tien programa, que va entamar el miércoles 16 de xunu y espurrise hasta’l 3 de xunetu. El pregoneru va ser el cantante Xune Elipe.

Foi’l 4 de xunetu de 1997, cuando’l Conceyu de Bimenes, dirixíu por Joaquín García (IX) protagonizó un fechu hestóricu al declarar la oficialidá del asturianu dientro del so territoriu, entamando un procesu que siguieron Morcín, Castrillón, Casu, Teberga, Llaviana, Llangréu y  Llanera. Sicasí, el Tribunal Superior de Xusticia d’Asturies declara nules toles mociones. Dende aquella fecha, el conceyu pioneru nel reconocimientu de los derechos llingüísticos vien celebrando la Fiesta de la Oficialidá.
 
Esti añu los actos van entamar el miércoles 16 de xunu, cola inauguración na Casa la Cultura de Santuyano de la esposición ‘La llingua asturiana na hestoria’. Mientres que’l 1 de xunetu van entregase los premios del XIII Concursu de Cuentos pola Oficialidá del Asturianu y facese llectura pública de la obra ganadora del primer premiu. L’actu sedrá a les 19.30 hores na Casa Conceyu (Martimporra).

Una hora más tarde, la Casa la Cultura de Santuyano, va acoyer la representación de la obra ‘Nel cielu hai una estrella’, a cargu del Grupu de Teatru “El Hórreo”. Al día siguiente nel mesmu llugar, va inagurase la exposición ‘La gaita n’Asturies’.

El sábadu 3 de xunetu ye’l día grande, entamando les actividaes a les 11.00 hores nel prau d’El Padrizu (Rozaes), cola apertura de la VIII Feria d’Artesanía y Mercáu de Productos Agroalimentarios. Darréu vendrá un pasucais de los grupos folklóricos Los Yerbatos (Bimenes) y Os Pauliteiros (Miranda del Douro) hasta la Casona de los Careaga, en Xenra.

Una vegada ellí, a les 12.00 hores daráse llectura al pregón, a cargu de Xulio Elipe Raposo ‘Xune’, cantante del grupu de rock Dixebra. Media hora más tarde vendrá la misa n’asturianu, oficiada por José Manuel García de Jesús y cantada por El Corriellu la Pandorga de Bimenes.

A les 13’15 hores, de vuelta al prau d’El Padrizu, entamará la Puya’l ramu, y darréu vendrá l’actuación de los grupos folklóricos Los Yerbatos (Bimenes) y Os Pauliteiros (Miranda del Douro). Mientres qu’a les 14.30 habrá una xinta popular. Pela tarde llegará’l turnu a los más mozos, con un taller de manualidaes pa neños y el XI Concursu de Gaiteros y Gaiteres Mozos.

El fin de la XIV Fiesta de la Oficialidá vendrá a les 23.00 hores, col conciertu de La Bandina la Curuxa, La Tarrancha y DJ – J15.