"Vas velo" yá tien ganadores

Si hai unos díes la Oficina Municipal de la Llingua de Xixón entregaba los premios "Ruempi la Mollera" empobinaos a los escolinos y escolines de Primaria, esta mañana llegó'l turnu de "Vas velo, trebeyos pal aula", concursu empobináu al alumnáu d'Educación Secundaria.

El concursu consiste na preparación de materiales escolares pa trabayar la llingua nel aula. Presentándose na edición d'esti añu dellos institutos de la ciudá y resultando finalmente ganadores los xuegos ‘Asturies, paraisu mitolóxicu’, ellaboráu polos escolinos de 3u d’ESO del IES Calderón de la Barca, y ‘La Quinta del tíu Vallín” de 3u d’ESO del IES Fernández Vallín.
El xuráu taba formáu por Urbano Rodríguez, maestru y académicu de númberu de l’Academia de la Llingua Asturiana; Fernando Padilla, responsable de Llingua Asturiana de la Conseyería d’Educación; Montse Machicado, responsable de la Estaya de la Llingua d’Avilés, y María Xosé Rodríguez López, responsable de la Oficina Municipal de la Llingua de Xixón.
Los miembros del xuráu valoraron positivamente la presentación ellaborada y orixinal d’entrambos trabayos, los temes variaos de los conteníos y centros d’interés que planteguen, que van dende la lliteratura hasta la gramática, pasando pela xeografía, los refranes, la mitoloxía y la historia d’Asturies. El xuráu entendió tamién que son entreteníos y didácticos, colo que puen ser una bona ferramienta pa les clases de los caberos cursos d’Educación Primara, ESO y Bachiller, en tanto que “ufren la posibilidá de trabayar la espresión oral en distintes situaciones de comunicación, xueguen tamién col pallabreru y planteguen cuestiones que posibiliten el conocimientu del patrimoniu cultural asturianu”, señaló María Xosé Rodríguez.
Fueron los propios alumnos de los institutos ganadores los encargaos de presentar a la prensa los sos xuegos, remanando pa ello un mui bon nivel d'asturianu. Dichos alumnos disfrutaron el mes pasáu del premiu del concursu, consistente nun viaxe a la zona portuguesa del dominiu llingüísticu asturianu Miranda do Douro.
La responsable de la llingua en Xixón quixo acabar asina mesmo la so intervención animando a los escolinos a siguir apuntándose a clases d’asturianu, “anque seya difícil l’asturianu siempre ta na matricula”. Al empar, tamién animó a usar davezu l’asturianu fuera de les clases de llingua.