‘Música tradicional en Conciyu Ḷḷena 2’

El próximu vienres 11 de xunu, va presentase en Teatru "Vital Aza" de La Pola (Ḷḷena) el discu ‘Música tradicional en Conciyu Ḷḷena 2. Archivu tradición oral d'Ambás’.
 
Fai tres años de la presentación del primer trabayu; un discu doble con 46 temes, centrándose más nos repertorios vocales y la tradición de pandereta. Con esti segundu trabayu, tamién doble, apúrrense materiales de gran valor recuperaos de la tradición musical del conceyu nestos últimos tres años.
 
Amás, auméntanse los temes publicaos a 76 y axúntase al importante repertoriu vocal de les dances, el bai ḷḷ e, el romanceru o l'asturianá, un interesante conxuntu de pieces instrumentales de parexa de gaita y tambor, y de cordioneros del conceyu. Tamién se publica nesta segunda tanda de rexistros sonoros la interesante grabación vieya de la misa de gaita de Felgueras (fecha pelos años sesenta).

Estes grabaciones de trabayu de campu tán feches catando la meyor calidá col interés de publicar les fontes orixinales que canta y toca'l pueblu, recoyer, publicar y difundir esti patrimoniu ye l'oxetivu del "Archivu de tradición oral d'Ambás".
 
Na presentación participarán los protagonistes del discu, xente de los l.lugares d'Armá, Campumanes, Carabanzo, Carraluz, Casorvía, Chanos de Somerón, Congostinas, La Cruz de Rospaso, Felgueras, Güeḷḷes, Muñón Fondiru, Palacio, Payares, Piedracea, Piñera Baxo, Reconcos, La Romía, Rospaso, Samiguel del Río, Sotieḷḷo y Teyeo, y grabaráse cola TPA pa emitila nel programa "Sones".