UNA diz que PSOE ya IU quieren tapar la xestión de Venturo XXI

UNA acusó a PSOE ya IU de querer tapar a Venturo XXI. Según Faustino Zapico "ye trise, y sospechoso que'l Gobiernu nun quiera investigar cómo y en qué usen los fondos públicos”.

Unidá Nacionalista Asturiana amosó la so solidaridá colos trabayadores de Venturo XXI y llamenta la “humildación” que-yos ta provocando'l Gobiernu asturianu al negase a investigar cómo una empresa que recibió sovenciones públiques, “cierra dexándolos nel paru ensin que naide de la más mínima esplicación creíble”.

Faustino Zapico, voceru d'UNA, señaló que “la negativa de crear una comisión d'investigación sobre Venturo XXI pa conocer les xestión de la empresa de los fondos públicos y qué criterios y condiciones usó l'Alministración pa conceder tales sovenciones ye triste y sospechosa, “talamente paez que PSOE ya IX tean más interesaos en tapar o lexitimar la xestión fecha en Venturo XXI que n'investigala”.

Tamién consideró “escapistes” les declaraciones d'Ángel González d'IX, onde indicaba qu’un Parllamentu nun puede dedicase a investigar a les empreses una por una porque, de lo contrario nun fadría otra cosa. Zapico señaló que “poques empreses hai que tengan tantu sofitu públicu y tan poco percorríu empresarial una vegada dilapidaes les sovenciones públiques”.

Afirmó, amás, que nun hai qu'investigar a la empresa, sinón a los responsables políticos que concedieron eses ayudes, “que son los que tienen que velar polos intereses públicos y nun esviar la responsabilidá como fai'l representante d'IX”.

Faustino Zapico denunció que “una seña d'identidá básica del Gobiernu PSOE-IU ye la de perder fondos públicos peles esquines y millones d'euros como si fueren sueltu” y que lo que teníen que facer ye “llimpiar bien la casa a ver si apaecen y asina nun tener que baxa-yos el sueldu a los funcionarios, recortar les pensiones y cortar derechos sociales”.

Pa finar, Faustino Zapico repitió la solicitú de destitución de Graciano Torre como Conseyeru d'Industria.