El C.P. Príncipe de Asturias gana'l "Ruempi la Mollera"

Esti llunes 7 de xunu entregáronse nel Centru de Cultura Antiguu Institutu los IV Premios del Concursu "Ruempi la Mollera" organizáu pola Oficina Municipal de la Llingua de Xixón pa escolinos y escolines del tercer ciclu de primaria del conceyu.

Nel actu d’entrega de premios proyectóse un Power Point con un resume de tolos trabayos presentaos y una esplicación de les entrugues que se ficieron nesti cursu escolar. Fue l'actor Toño Caamaño y la responsable de la Oficina Municipal de la Llingua, MªXosé Rodríguez los encargaos de conducir una entrega na que tamién actuaron dos actores del grupu “Nun tris” que punxeron una nota de bon humor y ficieron que l’actu fuera dinámicu y divertíu.
Nesta cuarta edición participaron 308 escolinos y escolines de 12 escueles de Xixón, quedando ganador el C.P. Príncipe de Asturias. El segundu puestu fue pal C.P. Julián Gómez Elisburu y el terceru pal C. P. Evaristo Valle, recibiendo'l C.P. Alfonso Camín un accésit.
Al empar, y dempués de la entrega de premios, l'alumnáu qu'asistió al actu fue'l primeru en visitar les dos esposiciones asitiaes nel segundu pisu del CCAI, "Ruempi la mollera" na que s'amuesen tolos trabayos que participaron nesta cuarta edición del concursu; y "Ciudaes hermanaes de Xixón"na que se fai un percorríu per Smara, Tinduf, Albuquerque, Puerto Vallarta, Niort, Novorossiysk, L’Habana y Santa Tecla, ciudades hermanaes con Xixón , al traviés de los dibuxos y desplicaciones de los escolinos y escolines participantes.