Ecoloxistes denuncien l'apertura de mines n’espacios protexíos

Los ecoloxistes denuncia que quieren abrir dos nueves mines nel Parque Natural de les Fontes del Narcea y del Ibias, “dalgo que paez una opción p’algamar subvenciones a curtiu plazu”.

L'actual Plan Rector d'Usu y Xestión del Parque Natural de les Fontes del Narcea y del Ibias prohíbe l'apertura de les mines, pero propiu Conceyu de Cangas defende un cambeu que permita l’apertura de nueves explotaciones en Carbachu y Xiyón.

La Coordinadora Ecoloxista afirma qu’onde quieren asitiar les mines son llugares d'altu valir natural onde hai presencia permanente d'especies protexíes, destacando los osos y el gallu montés, “que son dos especies en peligru d'estinción y qu'obligaría a intervenir a la Comisión Europea si siguiera alantre la tramitación”.

Señalen que tán xugando en plena crisis cola ilusión de los munchos  paraos de la zona, “utilizando como únicu argumentu la creación  de 80 puestos de trabayu, cuantu nestos momentos sabemos que toles esplotaciones soterraes de carbón semeyante a estes tán cerrando”.

Del mesmu mou, afirmen que-yos sorprende qu'en cuenta de caltener mines abiertes, pretenda reabrise estes, “coles  dificultaes que tienen por tar nun espaciu protexíu, paez más una estratexa d'un conocíu grupu mineru por llograr unos beneficios al curtiu plazu vía subvenciones”.
 
L'AVE, gastu inxustificáu
 
Del mesmu mou, afirmen que nun ta xustificáu’l gastu pal AVE n’Asturies yá que ente Xixón y Uviéu namás se ganaríen cinco minutos, “cuando podría ameyorase tol trazáu del país”.
 
Los ecoloxistes afirmen que’l documentu qu'agora ta a esposición pública diz que'l viaxe a Madrid va ser de dos hores y media dende Uviéu y tres dende Xixón. Poro, entienden que, “teniendo en cuenta que la duración media actual del trayectu Uviéu-Xixón ye de 35 minutos”, con esti nuevu trazáu ganaríense cinco minutos.

Asina, dende la Coordinadora entruguen que xustificación un gastu na construcción del túnel ente La Pola Ḷḷena y Uviéu cuando con esos recursos podría facese un ameyoramientu del actual trazáu.

“Creemos que, amás de ser un proyeutu d'eleváu impactu ambiental, ye un espilfarru realizar un gastu tan enorme cuando con esos recursos podría acometese la necesaria meyora de les conexones por ferrocarril en tola zona central asturiana tantu en trazaos como en tiempos”, afirmen los ecoloxistes.

Del mesmu mou, falen de la contaminación y l’altu consumu enerxéticu que va producir, cuando’l Principáu ta utilizando l’AVE pa defender les llinies d'alta tensión. “Si eses nueves llinies son agora más innecesaries qu'antes pol amenorgamientu na esportación dende Asturies, ¿acaso dende'l Gobiernu tán falando de la so necesidá pa la importación d'enerxía eléctrica pa l'AVE?”, apunten pa finar.