Aurelio Martín "preocupáu" ante la "opacidá" de la parte socialista

El conseyeru de Mediu Rural y Pesca, Aurelio Martín (IU), reconoció güei sentise "preocupáu" ante la "opacidá" de la que fai gala la parte socialista del Executivu.

Martín argumentó que dende hai mes y mediu, los conseyeros d'IU-BA-Verdes pidieron la información relativa a los ingresos no que va d'añu y que, sicasí, nun tuvieron respuesta alguna.
 
"Paez increíble que na actual situación pónganse esti tipu de 'chinitas' nel camín", comentó Martín nuna rueda de prensa ofrecida nel Gobiernu, con visible rocea ante lo que considera una negativa d'información nel senu del propiu Gobiernu.
  
L'Executivu asturianu ta apoyáu, dende payares del 2008, por un pautu de Gobiernu ente la FSA-PSOE y IU-BA-Verdes. D'esta manera, los socialistes ostenten la presidencia del Principáu, con Vicente Álvarez Areces, y ocho conseyeríes. La coalición, pela so parte, xestiona dos conseyeríes, la d'Aurelio Martín y la de Bienestar Social y Vivienda, dirixida por Noemí Martín.
  
Aurelio Martín fixo asina un llamáu públicu "a la responsabilidá" al presidente del Principáu, Vicente Álvarez Areces, pa que tolos miembros del Gobiernu puean tener la mesma información a la hora de tomar decisiones importantes.
  
De primeres, la información requerida debería de salir de la conseyería d'Economía y Facienda, xestionada por Jaime Rabanal. Pero los conseyeros d'IU-BA-Verdes tuvieron que calcar nos dos últimos conseyos de Gobiernu pa pidila, y nun tuvieron ésitu. Trátase, a xuiciu d'Aurelio Martín d'una decisión "inmadura" per parte de los sos responsables, porque, na so opinión tanto los conseyeros d'IU-BA-Veres como la ciudadanía "tienen derechu" a tar informaos.
  
Nel casu de nun ofrecer esa información, Aurelio Martín cree qu'Areces taría cayendo en "los mesmos erros" que José Luis Rodríguez Zapatero, al quitar a los ciudadanos d'una visión global de cómo tán les cuentes. Martín teme que tres esi "tapecimientu d'información" puea haber un programa d'axuste duru. Por eso, convidó a la parte socialista del Executivu a que s'instale "na serenidá y na capacidá de diálogu", desabriéndose de cualquier tentación de "soberbia", "prepotencia" o "amenaza".
  
No fondero de la solicitú d'información de los conseyeros d'IU atopa'l so interés por plantegar midíes que nun sólo afecten al gastu, sinón tamién a los ingresos. Aurelio Martín apuntó asina midíes de "solidaridá", en relación a midíes sobre l'IRPF, les tases del xuegu, l'impuestu de sucesiones o la fiscalidá verde. El principiu xeneral sería que'l que más tenga, más pague. "Llegó'l momentu de pidir un esfuerzu a los que más tienen", señaló.
  
Preguntáu sobre hasta cuándo podríen aguantar nel Gobiernu los conseyeros d'IU-BA-Verdes en vista de la situación, Aurelio Martín dixo qu'ellos siempres se caracterizaron pola "so responsabilidá" y la so "paciencia". Nun dio plazu temporal dalgún, pero dexó claro que la so formación política nun tendría sitiu nun Gobiernu qu'intentara implantar recortes importantes en materia de política social o amenorgamientu d'inversiones qu'afecten al empléu.