Nueva concentración n’Avilés contra la reforma llaboral

CSI y dellos partíos d’esquierda convoquen pa esti vienres 11 de xunu, a les 19.30 hores nel Parche (Avilés), una concentración contra la reforma llaboral y los retayos sociales.

L’actu ta convocáu pola Corriente Sindical d’Izquierda, Partido Comunista de Asturies-Corvera, Unión Proletaria, Andecha Astur, Partido Comunista de los Pueblos de España, Unidá Nacionalista Asturiana, Fai!, Colectivos de  Jóvenes Comunistas, UNA-Mocedá y Darréu.

Los organizadores denuncien que quieren convertir Asturies nun basureru y nun megaxenerador d’enerxía llétrica pal restu del Estáu, mientres la mocedá sigue emigrando y les persones en paru atópense nuna situación incaltenible.

Afirmen, que cola crisis el Gobiernu del Estáu dio a la banca 150.000 millones d’euros de los que nun se sabe ónde tán. Llueu, “como nun había más perres pa dar a los ricos”, señalen, decidieron tomar midíes como conxelar les pensiones, baxar los sueldos o subir la edá de xubilación, “ye dicir; trabayar más, cobrar menos y despedinos cando quieran”.
        
Dende los convocantes llamen salir a la cai p’amosar que nun queremos siguir careciendo les consecuencies d’un sistema capitalista diseñáu pa da-y puxu a la desigualdá y la explotación. “Hai que facer una fuelga xeneral y cuantes seyen necesaries pa torgar que los ricos seyan cada vegada más ricos y los probes cada vegada ms probes”, apunten pa finar.