Entamen una campaña de ‘dañu económicu’ a Israel

El CMPA y les ONGs piden que nun se compren productos israelinos dientro d'una campaña de protesta pola matanza d'activistes, “y les violaciones de los derechos humanos”.

El Conseyu de la Mocedá del Principáu d'Asturies y la Coordinadora de ONGDs camienten que, “como vien siendo habitual cada vegada que l’exércitu d’Israel comete una matanza, l'Estáu hebréu quede impune polos crímenes cometíos nel abordaxe a la Flotilla de la Llibertá”..

Marcelino Sánchez y Mercedes González, presidentes del Conseyu y de la Coordinadora respeutivamente, consideren qu'esisten munches torgues pa la comunidá internacional, “con unos gobiernos ataos por diversu compromisos políticos y comerciales”, consiga que los culpables comparezan énte un tribunal, asina como qu'Israel llevante’l bloquéu que caltien sobre la Faza de Gaza.

Les dos entidaes camienten que los ciudadanos, “cola fuerza que nos da la nuesa condición de consumidores, podemos contribuyir a restablecer la xusticia exerciendo una presión que tenga un impactu real, más allá de la mera protesta”.

Asina, faen un llamáu a la ciudadanía pa que nun merque productos israelinos, “aquellos que nos sos códigos de barres empiecen por 7 290'. Ye lo que na xíriga de la resistencia non violenta llámase 'campaña de dañu económicu'.
      
Xuntu con esta midida, tamién proponen otres acciones, como l’unvíu de cartes de protesta, tantu a los parllamentarios europeos como a los representantes diplomáticos israelinos. Al traviés de la Web www.palestinallibre.org, a partir del llunes espublizarán la información y los materiales de denuncia necesarios.