Llaviana enseña a conservar el paisaxe y l’idioma

La Conceyalía de Mediu Ambiente y la Oficina de Normalización de Llaviana entamen una campaña de sensibilización n’asturianu con motivu del Día Mundial del Mediu Ambiente.

Con esta iniciativa lo que se busca ye concienciar a los ciudadanos del peligru que suponen les acumulaciones illegales de basura, y de la necesidá de respetar y cuidar la naturaleza.

La campaña va desendolcase íntegramente n'asturianu, col oxetu de  garantizar que la llingua asturiana tenga presencia en tolos ámbitos, faciendo por que nun quede arrequexada nel ámbitu cultural. Quier treslladase a los ciudadanos que l'asturianu ye una llingua válida pa cualquier temática y situación comunicativa, y que la llingua asturiana, lo mesmo que'l paisaxe asturianu, necesita'l nuestru respetu y protección pa que nun se pierda.
    
El proyeutu que se va a poner en marcha consiste, nesta primer fase, na colocación de carteles informativos, anque yá ta previsto continuar la campaña nos meses vinientes col diseñu de midíes complementaries.