Areces pide "responsabilidá" p'aprobar los recortes

Areces llamó a la responsabilidá de los grupos parllamentarios p'aprobar los recortes y afirmó que la pretensión ye "ser coherentes y responsables" nel amenorgamientu del déficit.

"Vamos cumplir la obligación de ser parte del Estáu y contribuyir a menguar el déficit públicu. En casu de que nun pudiere facese na Cámara fairálo vía decretu y va ser más lesivo pa los trabayadores, polo que faigo un llamáu a la responsabilidá p'aplicar les midíes d'una manera racional, moderada y equitativa y asina lo vamos trayer a la Cámara llueu", dixo Areces.

Areces manifestábase asina mientres la so intervención nel Plenu de la Xunta pa responder a la entruga del voceru del PP, Ovidio Sánchez, que pidió al presidente rexonal qu'esplicare a los organismos o empreses del sector públicu que van suprimise p'amenorgar el déficit del Principáu.
  
Mientres la so intervención Areces desglosó les partíes a les que va afectar el recorte que va permitir aforrar 210 millones d'euros y manifestó que la mayor cuantía, 85,7 millones van recortase de los gastos corrientes; 68 millones del capítulu de personal; 28 millones de gastos financieros y 31 millones de la reprogramación del superávit.
  
"Lo que pretendemos ye facer esti recorte de manera racional, de forma que nun impacte a los derechos de los trabayadores y que la contribución a esti esfuerzu seya equitativa afectando menos a los que menos tienen", dixo Areces, qu'en respuesta a la entruga del PP sobre les empreses públiques manifestó que "el Gobiernu nun ta dispuestu a suprimir por suprimir".
  
Asina indicó que si se trata de funciones como la del ERA, el Sespa o demás organismos públicos, nun lo van facer, y acusó al PP de privatizar los servicios ellí onde Gobiernen. "Lo sustantivo del gastu de los entes públicos d'Asturies sopórtenlo'l Sespa, l'ERA o consorcios como Coxersa, de los que nun vamos prescindir sinón que los vamos a fortalecer a pesar de que'l PP los llame chiringos", dixo Álvarez Areces.
  
El líder del PP, Ovidio Sánchez, criticó la respuesta d'Areces y negó que cuando'l so partíu fala de los chiringos se refiera al ERA o al Sespa". "Nun-y pidimos que meta mano nel Sespa o l'ERA, hasta ehí podríamos llegar, pero si recortar gastos de los chiringos onde asitien a la so xente. Ehí podemos amenorgar más de 90 millones. O por exemplu na TPA, onde puen aforrase más de 200 millones", dixo Sánchez, que calcó en que ye ehí onde hai que recortar y nun meter mano a los más débiles.
  
"Tienen de recortar en viaxes de placer, en conseyeríes, n'altos cargos, en chiringos, na TPA y demás y va ver como los pensionistes y funcionarios nun precisen esos inxustos recortes", dixo Sánchez, qu'afirmó que por muncho qu'Areces los niegue n'Asturies la crisis ye tan grave como nel restu d'España, en parte por nun tomar midíes a tiempu.
  
Areces pela so parte tachó la intervención d'Ovidio Sánchez como "una muestra más de la demagoxa y incoherencia del representante del PP n'Asturies, asemeyada a la del PP n'España" y reprochó que se pida agora que se recorten cuestiones que los mesmos 'populares' reclamaron na Cámara.
  
"Ye increíble demagoxa tala, como puen ustedes presentase como máximos defensores de los funcionarios y los pensionistes. Ye una incoherencia y una esquizofrenia absoluta", dixo Areces.