Día del Llibru Asturianu

EEXX escusa a Israel pol ataque a la flota solidaria

|

El vicepresidente d'EEXX apoyó'l derechu d'Israel a torgar la llegada de barcos a Gaza. Mientres que'l primer ministru turcu diz que les rellaciones con Israel nun van volver ser iguales.

Comandos israelinos abordaron el pasáu llunes una flota solidaria conformada por seis barcos que trataba de romper el bloquéu marítimu que caltién Israel sobre la Faza de Gaza dende hai más de tres años pa repartir decenes de miles de tonelaes d'ayuda humanitaria. Na operación militar resultaron muertos diez civiles y decenes de firíos, según la ONX.
  
Estaos Xuníos foi bien cautelosu na so respuesta al operativu y nun s'unió al restu de la comunidá internacional na condena a Israel por utilizar la fuerza pa detener al convói humanitariu, asaltáu por cuerpos d'élite armaos qu'abordaron ún de los buques baxando dende helicópteros.
  
"Israel tien el derechu absolutu de protexer los sos intereses de seguridá", indicó Biden nuna entrevista col serviciu de radiodifusión públicu PBS. Sicasí'l vicepresidente norteamericanu repitió l'apoyu del so Gobiernu a una investigación tresparente y imparcial sobre lo asocedío.
  
Biden recordó qu'Israel alvirtiera a la flota humanitaria que si se dirixíen hacia'l norte podríen descargar el cargamentu y que'l so conteníu sería repartíu por Naciones Xuníes na Faza de Gaza. "¿Por qué calcar en dir directamente hacia Gaza?", dixo.
  
Poro, "ye lexítimo qu'Israel diga: 'Nun sé lo qu'hai nesi barcu. Esos tipos tán llanzando cohetes sobre los mios ciudadanos'", añadió en referencia al Movimientu de Resistencia Islámica (Hamás), que controla la Faza de Gaza dende'l 2007, negóse en repitíes ocasiones a establecer la paz con Israel y llanzó cohetes de forma continua contra l'Estáu hebréu.
  
Sicasí, Biden señaló qu'Estaos Xuníos precisa exercer "presión" y "convencimientu" sobre Israel pa permitir la entrada d'envíos humanitaries al territoriu palestín. "Discrepamos con dalgunos de los métodos tácticos qu'esti Gobiernu israelí utiliza y con dellos comentarios efeutuaos polos sos ministros (...) porque pensamos que son contraproducentes", dixo dempués de que-y preguntaren poles tensiones esistentes ente l'Alministración del presidente Barack Obama y la del primer ministru d'Israel, Benjamin Netanyahu.
 
Turquía diz que nada volvera ser igual
 
El primer ministru turcu, Recep Tayyip Erdogan, declaró esti xueves que les relaciones ente Israel y el restu'l mundu "nun volverán ser lo que yeren" tres l'ataque efeutuáu'l pasáu llunes por Israel contra la flota humanitaria que se dirixía a Gaza.   
 
"Les rellaciones ente Israel y el mundu nun volverán ser lo que yeren", declaró Erdogan, citáu pola axencia de noticies estatal, Anatolia. "Israel ta a un tris de perder al so mayor aliáu na rexón", prosiguió. Ocho de los nueve activistes muertos nel ataque yeren turcos y el novenu yera un estaoxunidense d'orixe turcu.

Contador Estadistiques