IU nun votará na Xunta Xeneral el recorte a los funcionarios

IU-BA-Verdes nun va votar a favor del recorte salarial del 5% a los funcionarios si'l Gobiernu nun aplica l'incrementu del IRPF a partir de les rentes de 60.000 euros, y non de 100.000.

Esta decisión dexaría al Grupu Socialista en minoría, suponiendo que'l PP vote en contra, torgando asina l'aprobación de la llei. Asina lo anunció güei'l coordinador xeneral y voceru parlamentariu autonómicu de la coalición, Jesús Iglesias, mientres una rueda de prensa conxunta col secretariu xeneral de CC.OO Asturies, Antonio Pinu, pa proponer salíes a la crisis económica.
  
Iglesias condicionó l'apoyu d'IU a la midida a un plan xeneral de reformes "qu'esixa sacrificios a tolos que tán en condiciones de facelos, y non namás a pensionistes y trabayadores públicos, que son los últimos a los que puen pidise estos esfuerzos". Como primer puntu, pidió que'l gravame que'l Principáu tien d'estudiar sobre l'IRPF de les rentes más altes seya a partir de los 60.000 euros añales, y non de los 100.000, como ayeri propunxo'l Principáu.
  
"Estes rentes tán en condiciones de compensar los otros sacrificios sin xenerar un grave problema pal que s'alcuentra nesta franxa", señaló, ente los que citó a "gran parte de los qu'ostentamos cargos públicos y responsabilidaes de gobiernu".
  
Nun foi lo única propuesta que formuló la formación: el caltenimientu del empléu públicu xuntu coles sos remuneraciones, el retoque d'otres figures fiscales, la eliminación de gastos non prioritarios, la garantía de les prestaciones sociales y el salariu social y la priorización d'inversiones imprescindibles.
  
Pa Iglesias, "la salida de la crisis n'Asturies nun pue ser el treslláu del decretazu de Zapatero, sinón un paquete de midíes equilibraes y conteníes". Asina, anunció que nun van votar a favor de la propuesta si nun s'almiten estes demandes. Y nesti sen, mostróse francu: "si IU nun lo vota, eso nun sal", en referencia al proyectu de llei autonómica que deberá sometese a votación esti mes na Xunta Xeneral pa faer efectivu'l plan de recortes anunciáu pol gobiernu central.
  
Nun realizó nenguna previsión de los que pasaría en casu de nun salir aprobada una midida que llega por mandatu estatal. "Habría un seriu problema políticu, económicu y social", llendóse a afirmar, al empar qu'una "interesante cuestión xurídica".