Riaño: “Defendo una inmersión parcial n’asturianu per fases”

La UABRA fina mañana’l plazu de matriculación con más de 100 persones apuntaes. Asturies.com fala con Xosé Antón González Riaño, direutor de la Universidá Asturiana de Branu.

¿Qué va diferenciar a la UABRA de los anteriores Cursos de Branu?

Hai diferencies cualitatives y cuantitatives. Dende’l puntu de vista cuantitativu podemos falar del númberu de cursos o la so diversidá. Mientres que dende’l cualitativu tán rellacionaos col enfotu d’apertura social. Poro, un importante porcentaxe de les xeres de la UABRA, (esposiciones, conciertos, charres…), van tar abiertes al públicu en xeneral, tean o non matriculaos nos cursos.

¿Va haber actividaes acullá de la primer quincena d’agostu?

Les actividaes de la Universidá Asturiana de Branu van llindase a esa fecha. Eso nun quier dicir que nun futuru próximu la UABRA vea la necesidá de facer actividaes n’otros puntos del calendariu, nun hai nada nel alcuerdu ente Academia, Universidá y Conceyu de Cangas que lo impida.

¿Cuál ye’l perfil de los alumnos de los Cursos de Branu?

Responde a los cuatro perfiles fundamentales de los cursos; formar pa la investigación filolóxica, deprender asturianu, conocer la realidá sociocultural del país y participar nesa idea d’apertura y divulgación, too ello col nuesu idioma como llingua vehicular. D’alcuerdu con esto, tenemos estudiantes de filoloxía que quieren especializase na investigación del asturianu, persones que quieren deprender a usar correctamente’l idioma y xente esmolecida pola problemática sociocultural d’Asturies.

Esti añu la UABRA va acoyer un cursu de periodismu, amás, dientro poco l’Academia va presentar un ‘Cartafueyu Normativu’ empobináu a los periodistes. ¿Ta poniendo la institución especial enfotu en formar a los profesionales de los mass media?

L’actualización del asturianu nos medios de comunicación ye una cuestión estratéxica pa l’Academia. Nesi sen, los principales destinatarios de los ‘Cartafueyos Normativos’ son los periodistes, amás del que tamos trabayando agora, muncho más específicu. El facer un cursu de llocución n’asturianu con profesionales n’activu sedría la parte práutica de los esfuerzos teóricos.

¿Quier asina l’Academia ufrir la formación necesaria énte la posibilidá d’una RTPA que faigu un usu xeneralizáu de l’asturianu?

A l’Academia prestaría-y qu’esti cursu respondiera a les necesidaes del llinguax periodísticu na radio y na televisisón. Al empar, que fuera un encontu pa que la RTPA diere yá’l pasu a una utilización normal del asturianu, sobre manera en programes de tipu informativu.

Vusté ye profesor de Ciencies de la Educación. ¿Cómo son los futuros maestros d’asturianu?

Anguaño hai unos 60 alumnos matriculaos na titulación de postgrau. Esti añu foi una promoción mui collaboradora y entusiasta, con estremaos niveles de conocencia llingüística, pero con unos resultaos perinterantes. Esta titulación va caltenese hasta’l cursu 2012/2013, cuando los estudios entamen a ser dafechu reglaos y se faigan pente medies de la Facultá de Formación del Profesoráu.

¿Cola mención d’asturianu de la so Facultá, va ser abondo pa formar a los futuros enseñantes?  

La mención ye perimportante porque homologa a los maestros d’asturianu col restu. Ye dicir, la mención d’asturianu tien la mesma carga horaria que la mención d’inglés o educación física. Nun hai nengún tipu de discriminación. De toles maneres, camiento qu’esa formación inicial tendría que completase en munchos casos con una capacitación llingüística más fonda y que vaya más allá de los conteníos de la mención. Pero va pasar lo mesmo col inglés, nun ye una cuestión de la mención d’asturianu.

Vusté ye tamién direutor de la Secretaria Llingüística pal Navia-Eo de l’ALLA. ¿Cómo camienta que tendríen que formase los futuros maestros d’eonaviegu?, ¿ye abondo cola formación qu'ufre l'ALLA dientro de los Cursos de Branu?

Los procesos formativos tienen qu’afayase a la realidá. Nuna situación d’oficialidá, les necesidaes reales del profesoráu del Navia-Eo sedríen d'unos 20 maestros. Poro, paezme que la formación que se ta dando nesti momentu ye una formación axustada. Lo que tien que facer la Universidá ye trabayar n’otros aspeutos más rellacionaos cola investigación que cola formación. Y cuando falo d’investigación nun me refiero namás a la investigación filolóxica, sinón a la educativa, onde la Universidá tien muncho por facer.

¿Ye posible anguaño, nel casu de que la Llei d’Usu tuviera cumpliéndose dafechu, una formación afayadiza de los escolinos n’asturianu?

Evidentemente non. Sicasí, l’ámbitu de la Llei onde hai cierta normalidá y ciertu compromisu ye’l educativu. El problema ye que les sos posibilidaes tán entendiéndose d’un mou dafechu restrictivu. Les posibilidaes de la Llei d’Usu fairían del asturianu una asignatura homologable más, nun entro yá nel so usu vehicular, que tamién sedría posible acordies cola llegalidá.

¿Nel casu de qu’hubiera oficialidá, que modelu llingüísticu tendría que tener la educación asturiana?

Pa entamar l’asturianu sedría una llingua más dientro del currículu, igual que les matemátiques o’l inglés, a les que naide noma ‘obligatories’, son asignatures necesaries pa la formación del escolín. El so usu vehicular tendría que plantegase d’un mou vehicular per fases. Yo defendo una serie de fases que llevaren a una inmersión parcial, ye dicir, que determinaes árees del currículu foren impartíes n’asturianu. Pongo como exemplu Conocimientu del Mediu, afayase perbien pa ser impartida n’asturianu porque fala de la realidá ecolóxica, hestórica o social de la nuesa Comunidá. Pa llograr que los escolinos manexen l’asturianu, el castellán y l’inglés ye necesaríu distribuyir les materies del currículu pa que les tres llingües tuvieren representaes.
 
Entós, ¿el Decretu de Feijóo sedría afayadizu p’Asturies?

Nun entro nesa valoración, paezme qu’esi Decretu tien una serie de trampes que nós nun tenemos qu’asumir. A min prestaríame que los futuros ciudadanos asturianos tuvieren una formación llingüística integral, dominando la llingua autóctona, estatal y estranxera

¿Nun ye raru que nun surda n’Asturies nenguna iniciativa privada a exemplu de les Ikastoles?

Como pasu previu a esa posibilidá, l’asturianu tendría que poder ufiertase na rede privada concertada. Cuando l’asturianu tenga hai un bon nivel d’implantación, de xuru qu’habría iniciatives que planteguen un interés social y económicu a entamar un centru onde l’asturianu fora la llingua vehicular de tolos conteníos.