UNA pide la destitución de Graciano Torre como conseyeru d'Industria

UNA pon a Arcelor, Venturo XXI y l'anunció de pieslle de Chupa-Chups como exemplos de la “ineficacia” de la política industrial. Poro, pide la destitución de Graciano Torre.

Unidá Nacionalista Asturiana considera les polítiques industriales del Gobiernu de PSOE-IU son “dafechu nocives” pal normal desenvolvimientu económicu ys industrial d'Asturies. "Les polítiques industriales d'esti Gobiernu son la dilapación de subvenciones económiques a empreses ensin conseguir contraprestaciones y garantíes a cambiu", afirmó Faustino Zapico, voceru nacional d'UNA.

"El Gobiernu asturianu nun tien absolutamente nenguna credibilidá nin respetu por parte de los responsables de les empreses asitiaes n'Asturies", declaró Faustino Zapico. Asina mesmo añadió que "con Arcelor-Mittal había un alcuerdu que se ta incumpliendo sistemáticamente por parte de la empresa ensin que los responsables del Gobiernu puedan imponer la so autoridá".

Faustino Zapico tamién fixo mención a la situación que sofren los trabayadores de Venturo XXI, "los fondos mineros derrocháronse en subvencionar empreses que teníen como únicu oxetivu ya interés productivu la obtención d'estes subvenciones pa depués zarrar, ye'l casu actual de Venturo XXI o Alas-Aluminium, usando como escusa la crisis".

Nel casu de la fábrica de Chupa-Chups de Piloña tamién fixo referencia a la so alta productividá, en palabres del responsable de la empresa, "y a pesar de ser una planta muncho más productiva que la ximielga que tien la empresa en Cataluña, esta decide concrentrar ellí la so producción".

La causa d'esta actuación por parte de Chupa-Chups, en pallabres de Zapico, nun ye otra que "la falta de capacidá política que demuestren los responsables del gobiernu asturianu que nin siquiera nuna situación de ventaxa competitiva y con ayudes públiques recientes son quien a forzar pa que la empresa mantenga la producción n'Asturies".