"Empezaron los disparos indiscriminaos y a cayer les víctimes"

El periodista español David Segarra, que formaba parte de la denominada flota solidaria, calificó de "desvergüenza absoluta" que'l Gobiernu hebréu acuse a los activistes de llevar armes.

Tanto Segarra como los otros dos españoles qu'integraben la denomada 'Flota de la Llibertá' llegaron esta madrugada al aeropuertu internacional Atatürk, en dexándolos en llibertá les autoridaes d'Israel.  

Antes que se produxera l'operativu militar israelín, "tábamos na sala de prensa cuando en ciertu momentu toles comunicaciones desapaecieron. Cayó Internet, cayeron la televisión, el satélite, los teléfonos... Yá imaxinamos que yera un actu de guerra electrónica de l'Armada israelina", aseveró Segarra nuna entrevista a la cadena Telesur, pocos minutos dempués d'aterrizar n'Istambul.
  
"Nesi momentu salimos coles nueses cámares a ver qué taba asocediendo nel esterior y alcontrámonos colos comandos, que taben nes llanches rápides, y vimos cómo s'esplegaben hacia nosotros tamién con helicópteros", indicó'l periodista, que taba nel interior del barcu turcu pa cubrir el momentu de la espedición humanitaria pa la cadena llatinoamericana.
  
"Empezaron los disparos indiscriminaos con fueu real y con granaes de contusión y de soníu. Empezamos a ver cómo cayíen les primeres víctimes. Siguimos grabando y vimos cómo se producíen cada vez más y más víctimes", añadió Segarra.
  
El Gobiernu israelín aseguró que l'actuación de los sos militares y la muerte de polo menos nueve activistes debióse a qu'éstos llevaben armes y munición a bordu, coles qu'atacaríen a los soldaos. "Ye una falta de vergüenza absoluta realizar eses declaraciones cuando se manden dos buques de guerra, submarinos, helicópteros y unidaes d'élite contra persones desarmaes y civiles", denunció'l periodista español. "Ye una desvergüenza absoluta", repitió.
  
"Lo único que s'utilizó fueron palos de madera y cuchellos de cocina, elementos que tán en cualquier barcu del mundu, y eso nun ye a enfrentar a una unidá de elite armada hasta los dientes y con tou tipu de medios militares", aseguró.
 
Nueve muertos con firíes de bala
 
Los nueve activistes muertos mientres l'asaltu, ocho turcos y un ciudadanu estaoxunidense d'orixe turcu, presentaben firíes de bala, según informaron fontes oficiales forenses a l'axencia estatal de noticies turca Anatolia.
  
L'Institutu Médicu Forense turcu informó esti xueves de les nacionalidaes de los muertos y indicó, a acabar les autopsies, que toos ellos presentaben firíes de bala, añadió l'axencia. Los resultaos de los exames químicos de los cadabres van facese públicos dientro de dos o tres selmanes.
  
Aparte, l'Institutu esaminó a cerca de 500 activistes treslladaos a Turquía dende Israel. Los británicos y los suecos prefirieron nun pasar estes revisiones y optaron por facelo nos sos respeutivos países, según Anatolia.