La Universidá d'Uviéu va analizar les fronteres ente llingües

|

El Seminariu de Filoloxía Asturiana entama un Congresu que, baxo'l títulu xenéricu ‘Ciencia, llingua y fronteres’, va celebrase los díes 5 y 6 d'ochobre del 2010 na Facultá de Filoloxía.

La llingüística ye una ciencia que, de siempre, enfrentóse al problema de clasificar y tipificar la diversidá llingüística mundial, la realidá multiforme del llinguaxe como atributu biolóxicu de la especie humana. Nesti llabor de reconocer les unidaes d'estudiu, los tipos, dominios o llingües, va implícito reconocer y midir les fronteres ente tales unidaes, lo que pon a la llingüística ante problemes específicos de taxonomía y categorización que tovía nun tán resueltos dafechu.

Asina, el Congresu va analizar si tien sentíu'l conceptu de llingua o dialeutu, que criterios hai que manexar p’analizalos o cómo se conciben les fronteres ente llingües o ente dialeutos. Nesti debate van participar especialistes asturianos, españoles y europeos en Llingüística Xeneral, en Romanística, en Dialectoloxía Hispánica y Dialectoloxía Asturlleonesa.

Sicasí, dende’l Seminariu apunten que'l debate trespasa les llendes de la propia llingüística, asina que tamién se sentirán les argumentaciones d'especialistes en Filosofía del Llinguaxe, Antropoloxía o Bioloxía, disciplines que comparten delles de les esmoliciones alredor del conceptu de tipu y frontera.

El Comité Organizador del Congresu ta presidíu por Ramón d’Andrés, actuando de secretaria Taresa Lorences y siendo vocales Xulio Viejo, Fernando Álvarez-Balbuena García y María Cueto Fernández.

Mientres que’l Comité Científicu tará formáu por Hans Goebl (O. Univ. Prof. de Romanística, Universidá de Salzburgo, Austria), Joan Veny i Clar (Catedráticu Eméritu de Filoloxía Catalana, Universidá de Barcelona, Institut d'Estudis Catalans), José Ramón Fernández González (Catedráticu de Filoloxía Románica, Universidá d'Uviéu), Antonio Vespertino Rodríguez Rodríguez (Catedráticu de Filoloxía Románica, Universidá d'Uviéu), José Antonio Martínez García (Catedráticu de Llingua Española, Universidá d'Uviéu) y Enrique del Teso Martín (Decanu de la Facultá de Filoloxía, Universidá d'Uviéu).

 

Contador Estadistiques