Más de 300 reses van participar nel concursu de races asturianes

Un total de 320 reses de 58 ganaderíes, van participar esti fin de selmana nel Ferial de Torrelavega nel Concursu-puya de les races asturiana de los valles y asturiana del monte.

L'alcuentru entámalu l'Asociación de ganaderos cántabros 'La Socarreña' y l'asociación del sector 'Aseamo', col patrociniu de la Conseyería de Desarrollu Rural, Ganadería, Pesca y Biodiversidá, y del Conceyu de Torrelavega.

Esta nueva cita nel Mercáu Nacional de Ganáu 'Jesús Collado Soto' presentóla ayeri en rueda prensa'l conceyal de Feries y Mercaos, Pedro Aguirre (PSOE); el director del Ferial, Isaac Bolado, y los representantes de La Socarreña y Aseamo, Francisco Pérez y Carlos Fidel Vego, respectivamente.
  
El concursu-puya, que se celebra'l segundu añu en Torrelavega -la primera edición foi nel 2008, y namás foi puya- va entamar el vienres día 4 de xunu a les 14.00 hores cola entrada del ganáu.
  
El sábadu y el domingu, n'horariu de mañana y tarde, el recintu va permanecer abiertu al públicu pa que puean siguir les calificaciones de les distintes reses, unes calificaciones que van correr al cargu de diez xueces d'estes dos asociaciones estatales de les races en competición.
  
De les 58 ganaderíes que concursarán, diez son cántabres y entreguen en total mediu centenar d'animales. El restu son na so mayoría d'Asturies, según esplicó Francisco Pérez, que detalló que del total de participantes 100 animales son de la raza asturiana del monte, de 14 ganaderíes distintes, ente que 220 reses son de la raza asturiana de los valles, procedentes de 44 ganaderíes.
  
El concursu va diferenciase n'ocho secciones (sementales, xates, xatines, vaca nueva, vaca entemedia, vaca adulta, vaca con cría y llote de cuadra y criador), y van escoyese amás los meyores exemplares tantu nel concursu estatal como autonómicu.
  
El presidente de 'La Socarreña' destacó la puya, la mañana del domingu 6 de xunu (a les 11.00 hores) de 27 sementales, 21 d'ellos de la raza asturiana de los valles, que va partir con un preciu de salida de 1.600 euros. Amás, van puyase otros seis seis de la raza asturiana del monte, con un preciu de salida de 700 euros  por exemplar. "Esta puya va permitir dotar a ganaderos d'una meyora xenética pa les sos ganaderíes", destacó Francisco Pérez.
  
Pela so parte, el conceyal de Feries y Mercaos convidó a los vecinos a asistir a un concursu distintu nel que, amás, "apóyase a un sector precisáu d'ayuda".