El Principáu diz que’l TXE sofita’l so modelu farmaceúticu

Tres que’l Tribunal de Xusticia européu dictaminara que la regulación de farmacies ye illegal, el Principáu diz que la sentencia da-yos la razón y consolida'l so modelu farmacéuticu.

El dictame del Tribunal de Xusticia de la Xunión Europea vino pol casu de dos farmacéuticos españoles que solicitaron autorización n'Asturies p'abrir una oficina de farmacia. El pidimientu refugólu'l Principáu, que se basó na norma autonómica que regula les oficines de farmacia y botiquín.

Al alegar duldes sobre la compatibilidá d'estes disposiciones col principiu de llibertá d'establecimientu consagráu nel Tratáu, el Tribunal Superior de Xusticia d'Asturies elevó'l casu al TXE, que dictaminó que la norma que regula l'abertura de farmacies n'Asturies ye illegal, al entender que la normativa discrimina a los farmacéuticos de fuera.

Amás, el Tribunal consideró que la normativa asturiana ye apropiada pa garantizar l’oxetivu de que les farmacies puean ufrir serviciu a tolos ciudadanos. Sicasí, la sentencia señala que l'aplicación uniforme de les normes de base de 2.800 habitantes y 250 metros ente les farmacies establecíes pol decretu podría nun garantizar un accesu apropiáu a l'atención farmacéutica en zones que presenten ciertes particularidaes demográfiques.

Asina, falaben de les zones rurales onde la población ta dispersa y ye menos numberosa, colo que dellos ciudadanos podríen vese privaos d'un accesu apropiáu a l'atención farmacéutica. Del mesmu mou, el TXE diz que nes ciudaes l'aplicación estricta del requisitu de la distancia mínima podría dar llugar a que'l perímetru previstu pa una única farmacia incluyere a más de 2.800 habitantes.

Sicasí, el Principáu diz que la sentencia consolida'l nomáu modelu mediterráneu d'ordenación farmacéutica y la llexislación asturiana, “qu'establez criterios de población y distancia como elementos de planificación na apertura de nueves oficines de farmacia, coles mires de garantizar en tola comunidá una accesibilidá homoxénea, segura y de calidá”.

L’Executivu entiende que’l fallu del Tribunal dexa a la Conseyería de Salú siguir “asegurando” que les árees rurales de la periferia, “menos curioses dende un puntu de vista de rentabilidá económica”, sigan cuntando con una atención farmacéutica nes mesmes condiciones que’l restu del país.

Con too, a la fin afirmen que la sentencia cuestiona'l decretu autonómicu d'apertura d'oficines de farmacia al primar na fase de concursu l'exerciciu profesional nel territoriu asturianu. “Resuelta la cuestión prexudicial pertenez al Tribunal Superior de Xusticia d'Asturies resolver sobre l'oxetu de la demanda que dio llugar al planteamientu de les cuestiones prejudiciales ante'l TXE”, afirma’l Gobiernu asturianu pa finar.