L’APTVA denuncia a la TPA ente la Fiscalía anti-corrupción

L’APTVA vien de presentar una denuncia contra la RTPA ente la Fiscalía Especial pa la Represión de los Delitos Económicos Rellacionaos cola Corrupción

Na denuncia, según indiquen dende l’Asociación de Procuctores de Televisión n'Asturies, recueyense y documenten unes actuaciones llevaes a cabu por TPA y denuncies, en dalgunos casos, de la Sindicatura de Cuentes. Ente elles, citen la manipulación del contratu públicu, l’incumplimientu de la llei al traviés de l’adxudicación de paquetes de producción a empreses ensin esixir xustificación de la solvencia técnica,  la robla de contratos con empreses ensin constituir, posibles pagos de comisiones a intermediarios, contratación sistemática por millones d’euros ensin convocatoria pública conocida, financiación illegal pola robla de convenios con Conseyeríes, cesión de bienes públicos a empreses privaes, enchufismu familiar…

L’APTVA considera qu’esto tien gravedá abondo pa solicitar l’apertura d’una investigación sobre la xestión de la TPA, a la que nos últimos cuatro años foron a parar 160 millones d’euros según reflexen los presupuestos xenerales del Principáu, los convenios con Conseyeríes, “al traviés de los cuales puen tar sorteando los Presupuestos Xenerales”, y les partíes del Plan d’Infraestructures.

“Dende la so puesta en marcha, TPA foi xestionada dende’l secretismu y la ocultación, la única vegada que pudimos tener conocimientu sobre la so xestión foi al traviés de l’auditoría de la Sindicatura de Cuentes, que detectó 23 irregularidaes”, recuerden.

Esta ye la segunda acción xudicial emprendida pola APTVA contra TPA tres la presentación de los xuzgaos de Xixón, el pasáu 17 de mayu, d’una demanda contra les instrucciones de contratación de la canal. Próximamente la APTVA presentará énte instancias europees una tercera denuncia.